Gandak News
Our News Your Views
Url

छाब्दीबाराही मोटरमार्गको कालोपत्रे बर्खाअघि नै सकिने, एउटै सडकमा ३ तहका सरकारको लगानी

पहिलो चरणको काम शुरु, वडाले बनायो छाब्दी जाने वैकल्पिक बाटो

किरण श्रेष्ठ, तनहुँ । तनहुँको प्रसिद्ध धार्मिक तीर्थस्थल छाब्दीबाराही जाने मोटरमार्गको बुधबार देखि ग्राभेल सुरु गरिएको छ । उक्त मार्ग कालोपत्रेका लागि संघीय, प्रदेश र स्थानीय तहले बजेट विनियोजन गरेका छन ।

Loading...

पहिलो चरणमा संघीय सरकारले बिनियोजन गरेको बजेटबाट काम तिब्र गतिमा भईरहेको छ । उक्त सडकखण्डमा दैनिक ४० जना कामदारले काम गरिरहेका छन ।

संघ र प्रदेश बजेटबाट कालोपत्रे हुने सडकको ठेक्का डायमन्ड कन्स्ट्रक्सन प्रालि दमौलीले पाएको छ भने ब्यास नगरपालिकाको ठेक्का जिएस कन्स्ट्रक्सन प्रालि दमौलीले पाएको छ ।

 

दमौलीदेखि छाब्दीसम्मको कच्चीसडक कालोपत्रेका लागि ब्यास नगरपालिकाले १ करोड ८४ लाख रुपैयाँ, संघीय र प्रदेश सरकारले १–१ करोड रुपैयाँ बजेट विनियोजन गरेका छन् ।

३ वटै तहका सरकारको छुट्टाछुट्टै बजेटमा उक्त मार्गको ३ किलोमिटर खण्डमा कालोपत्रे गर्न काम शुरू भएको छ । कालोपत्र गर्नु अघि सडकमा अहिले ग्राभेलको काम भईरहेको छ ।

सडक डिभिजन कार्यालय दमौलीका प्रमुख विष्णु काफ्लेले छाब्दीमार्गलाई उच्च प्राथमिकतामा राखेर बर्खा शुरू हुनु अगाडि नै कालोपत्रे सकिने गरी काम गरिने बताए ।

पहिलो चरणको काम शुरु

Loading...

दमौलीबाट छाब्दीतर्फ जाने पहिलो खण्डमा संघीय सरकारले विनियोजन गरेको १ करोड रुपैयाँबाट पक्की कटिङ, ड्रेन, नाला निर्माण र ७९० मिटर सडक कालोपत्रे गर्ने कामको शुरूवात स्वरूप ग्राभेल सुरु भएको डायमन्ड कन्स्ट्रक्सन प्रालि दमौलीका आरसी पौडेलले बताए ।

गण्डकी प्रदेश सरकारले विनियोजन गरेको १ करोडबाट छाब्दीबाट दमौलीतर्फ आउने ७६० मिटर सडकमा पक्की नाला निर्माणसहित सडक चौडा र कालोपत्रेको काम शुरू गर्ने तयारी गरिएको छ ।

यसैगरी ब्यास नगरपालिकाले विनियोजन गरेको १ करोड ८४ रुपैयाँ बजेटबाट भड्खलादेखि गौंडाको पहराको पूर्वतर्फको उकालोसम्म १ हजार ३२० मिटर सडकखण्डमा कालोपत्रेको काम भइरहेको छ ।

व्यास नगरपालिकाले यो मार्गलाई नगरस्तरीय मार्गको रुपमा छनोट गरी कालोपत्रेका लागि बजेट विनियोजन गरेको नगरपालिकाका प्रमुख प्रशासकीय अधिकृत दिनेशराज पन्तले बताए ।

एउटै सडकमा ३ तहका सरकारको लगानी

तनहुँको प्रसिद्ध धार्मिक तीर्थस्थल छाब्दीबाराही जाने मोटरमार्ग कालोपत्रेका लागि संघीय, प्रदेश र स्थानीय तहले बजेट विनियोजन गरेका छन ।

सडकलाई ३ खण्डमा विभाजन गरेर ३ तहको सरकारले विनियोजन गरेको रकमले कालोपत्रेको काम शुरू भएको सडक उपभोक्ता समितिका सचिव निर्मल पण्डितले जानकारी दिए ।

ब्यास नगरपालिकाका प्रमुख बैकुण्ठ न्यौपानेले एउटै आयोजनालाई तीन सरकारले बाँडेर आ–आफ्नो तरिकाले काम गर्ने लागेकोले अब छिटै कालोपत्रेको काम सकिने बताए ।

वडाले बनायो छाब्दी जाने वैकल्पिक बाटो

त्यस्तै व्यास नगरपालिका वडा नम्बर १३ ले प्रसिद्ध धार्मिक तीर्थस्थल छाब्दीबाराही जाने मोटरमार्गको वैकल्पिक बाटो बनाएको छ । वडाले व्यास नगरपालिका संग समन्वय गरेर वैकल्पिक बाटो निर्माण गरेको हो ।

सर्वसाधारण र स्थानिय लाई सजिलो होस् भनेर वैकल्पिक बाटो बनाइएको व्यास-१३ का वडा अध्यक्ष लेख बहादुर रानाले बताए । भड्खलाको बिमलेचौतारा देखि सैसतीसम्म २.४ किलोमिटर वैकल्पिक बाटो खोलिएको वडाअध्यक्ष रानाले बताए ।

सडक निर्माण कार्यमा बाधा नपुगोस भनेर वैकल्पिक बाटो बनाइएको वडाअध्यक्ष रानाले बताए । ४ दिन देखि वैकल्पिक बाटो संचालनमा आएको छ ।

गत वैशाख ४ गते देखि ६ दिनका लागि छाब्दी वाराही जाने सडक अवरुद्ध भएको थियो । सडक कालोपत्रे गर्ने काम जारी राख्न छाब्दि मार्ग अवरुद्ध भएको थियो । भड्खला देखि गौंडाको पहराको पूर्वतर्फको उकालोको काम भईरहेको र वैकल्पिक मार्गको व्यवस्था नगरपालिकाले गर्न नसकेकोले छाब्दी मार्ग अवरुद्ध पारेको थियो ।

प्रतिक्रिया
लोड हुँदै ...

ट्रेन्डिङ

छुटाउनुभयो कि?