काठमाडौं । सुविन भट्टराईको चर्चित उपन्यास ‘समर लभ’मा आधारित फिल्म ‘समर लभ’ आगामी २५ माघ (भ्यालेनटाइम डे)बाट प्रदर्शनमा आउने भएको छ । निर्माण टिमले फिल्मको फस्टलुक सहित प्रदर्शन मिति सार्वजनिक गरेको हो ।

सार्वजनिक फष्टलुकमा फिल्मका मुख्य कलाकार सुरज सिंह ठकुरी, नम्रता सापकोटा, आशिष पिया र रेवती क्षेत्री अटाएका छन् । फिल्मबाट आशिष र रेवतीले डेब्यु गर्दैछन् । आशिष मोडलिङबाट अभिनयमा भित्रिएका हुन्, भने रेवती भारतको तर्फबाट मिस इन्टरनेसनल विजेता हुन् ।

रेवतीले यसअघि ‘ग्याङग्स अफ नर्थवेस्ट’, ‘खातुन’, ‘ह्याप्पी फिर भाग जाएगी’ जस्ता फिल्ममा काम गरिसकेकी छिन् । फिल्मको निर्देशन मुस्कान ढकालले गरेका छन् । उनले यसअघि ‘नाइँ नभन्नू ल’ सिरिजको तेस्रो भाग निर्देशन गरेका थिए । फ्लोरमा गएको लगभग एक वर्षपछि फिल्म हलमा आउन लागेको हो ।

निर्देशक ढकालले विदेशको सुटिङ र फिल्ममाथिको अपेक्षालाई पूरा गर्ने गरी तयार गरिरहँदा समय लागेको बताए । सुबिनको कथालाई सामीप्यराज तिमल्सेनाले पटकथामा ढालेका हुन् भने फिल्मको संवाद सुबिन र सामीप्य मिलेर लेखेका छन् ।

नाइटिंगेल इन्टरटेनमेन्टको ब्यानरमा निर्माण गरिएको फिल्ममा खगेन्द्र श्रेष्ठ र इन्दु भण्डारी निर्माता रहेका छन् भने बिनोद अधिकारी कार्यकारी निर्माता रहेका छन् ।