काठमाडौं । प्रधानमन्त्री केपी शर्मा ओलीले आफू कुन पार्टीको भनेर सर्वोच्च अदालतले देखाइदिएको बताएका छन् ।

आइतबार बसेको प्रतिनिधि सभा बैठकमा आफू इतर रहेका सांसदले ‘प्रधानमन्त्री कुन पार्टीको हो ?’ भनेर प्रश्न गरेको उल्लेख गर्दै ओलीले सर्वोच्च अदालतले प्रधानमन्त्री कुन पार्टीको हो भनेर देखाइदिएको बताए ।

सोमबार अन्तर्राष्ट्रिय महिला दिवसको अवसरामा आयोजित कार्यक्रमलाई सम्बोधन गर्दै प्रधानमन्त्री ओलीले यस्तो बताएका हुन् ।

आइतबार बसेको प्रतिनिधि सभा बैठकमा नेकपा (प्रचण्ड-नेपाल) समूहका नेता एवम् सांसद भीम रावलले ‘प्रधानमन्त्री कुन पार्टीको हो ?’ भन्दै प्रश्न गरेका थिए ।

रावलको उक्त अभिव्यक्तिप्रति संकेत गर्दै सोमबार ओलीले भने, ‘एकजनाले सोधेका थिए, प्रधानमन्त्री कुन पार्टीको हो ? जानकारी पाउँ । सर्वोच्च अदालतमा सोध्न जानुहोस् कुन पार्टीको हो ।’

प्रचण्ड-नेपालले आफूलाई नेकपाको साधारण सदस्यबाट समेत निष्काशन गरेर कारबाही गरेको पसंग उल्लेख गर्दै ओलीले भने, ‘उहाँहरुले मलाई नेकपाको साधारण सदस्यबाट कारबाही गरेको होइन् ? म नेकपाको सदस्य हैन । सर्वोच्च अदालतले भनिदियो म कुन पार्टीको हो ।’