नेपाली काँग्रेसको १५ औं महाधिवेशनबाट पोखराका युवा उद्यमी किरण केसी केन्द्रीय सदस्यमा निर्वाचित भएका छन् । पहिलोपटक केन्द्रीय निर्वाचनमा होमिएका केसीलाई पहिलो प्रयासमै खुल्लातर्फ देशभरका प्रतिनिधिहरूले उल्लेख्य मत दिएर राजनीतिमा उल्लासपूर्ण स्वागत गरेका छन् ।

खुलातर्फ ४५ पदका लागि भएको निर्वाचनमा ८९ जना प्रतिस्पर्धामा थिए । केसीलाई प्रतिनिधिहरुले रुचाउँदा २८ औं स्थानमा रहेर निर्वाचित भएका छन् । केसीले २ हजार ७ सय ७४ मत प्राप्त गरेका छन् ।

को हुन् किरण ?

किरण लोकप्रिय मतका साथ कास्की २ बाट महाधिवेशन प्रतिनिधि निर्वाचित भए । किरणले एकै पटक पटक ठूलो पद र नेतृत्व खोजेका होइनन् । प्रतिनिधिबाट लोकप्रिय मतले केन्द्रीय सदस्य हुँदै अबको राजनीतिमा आफ्नो हिस्सेदारी पनि बढाउने योजनासहित किरण १५ औं महाधिवेशनमा केन्द्रीय सदस्यको प्रतिस्पर्धामा उत्रिएकोमा उत्तीर्ण भएका छन् ।

केसी ग्रुप अफ कम्पनिजको निर्देशकको रूपमा समग्र व्यावसायिक समूहलाई एकै छाता मुनि ल्याएर केसीले व्यवस्थापन गरिरहेका छन् । वित्तीय क्षेत्रतर्फ सन नेपाल लाइफ इन्स्योरेन्स लिमिटेडमा निर्देशक रहेका किरण माछापुच्छ्रे बैंक लिमिटेड र युनाइटेड अजोड इन्स्योरेन्स कम्पनी नेपाल लिमिटेडमा प्रवर्तक छन् ।

निर्माण तथा हस्पिटालिटी क्षेत्रमा नेपालको ‘क’ वर्गको निर्माण कम्पनीको रूपमा केसी कन्स्ट्रक्सन फर्म र केसी कन्स्ट्रक्सन प्रालि तथा जयभद्रकाली डेभलपर्स कम्पनी प्रालिमा निर्देशक रहेका केसीले अहिले जलविद्युत क्षेत्रमा नेतृत्व गरिरहेका छन् ।

सूर्योत्थान लक्जरियस अपार्टमेन्ट, पोखरा होम्स प्रालि र जयभद्रकाली होटेलियर्स प्रालिमा पनि उनी निर्देशक छन् । शिक्षा तथा फिटनेस क्षेत्रतर्फ पोखराको काजीपोखरीस्थित कालिका मल्टिपल क्याम्पसको अध्यक्ष र पोखरा स्कुल अफ टुरिजम एन्ड हस्पिटालिटी म्यानेजमेन्टसँग पनि उनी जोडिएका छन् ।

जलविद्युत विकासको क्षेत्रमा किरण केसी र केसी ग्रुपको लगानी र नेतृत्व अग्रपंक्तिमा छ । केसी ग्रुपले अहिले जलविद्युतको क्षेत्रमा छलाङ नै मारिरहेको छ ।

सिक्लेस हाइड्रोपावर लिमिटेड (१३ मेगावाट) मा २०७२ देखि निर्देशक र २०८२ देखि अध्यक्षको रूपमा कार्यरत किरणले एम्पिक एनर्जी प्रालि (१३२ मेगावाट), अपर मर्स्याङ्दी हाइड्रोपावर कम्पनी प्रालि (१०२ मेगावाट) र सुभानकित हाइड्रोपावर प्रालि (८ मेगावाट) मा अहिले नेतृत्व गरिरहेका छन् । साना ठूला १० वटाभन्दा बढी जलविद्युत आयोजनाको नेतृत्व अहिले किरणले गरिरहेका छन् ।

केसीले लामो समयसम्म उद्यम, व्यवसाय र सामाजिक क्षेत्रमा सक्रिय रहँदा समाजका वास्तविक समस्या, नागरिकका पीर–मर्का र राज्यका नीतिगत कमजोरीहरूलाई नजिकबाट नियालेका छन् । सहज लगानीको वातावरण र सरकारी नीतिगत समस्याहरूलाई केवल बाहिर बसेर आलोचना गर्नुभन्दा नीतिगत तहमा प्रत्यक्ष सहभागी भएर समाधान गर्नुपर्छ भन्ने सोचका साथ नेपाली कांग्रेसको राजनीतिमा सक्रिय भएको उनी बताउँछन् ।

व्यावसायिक क्षेत्रमा सफलताबाट पछाडि हट्नु नपरेका केसीले अब राजनीतिक परीक्षामा उत्रिएको बताउँछन् । राजनीतिक यात्राको पछाडि मुख्यतया देशको दीर्घकालीन समृद्धि, उद्योग–व्यवसायमैत्री वातावरणको निर्माण र युवा पुस्ताका लागि स्वदेशमै रोजगारीका अवसर सिर्जना गर्ने भावना प्रमुख रूपमा जोडेको केसी बताउँछन् ।

गण्डकीबाट को को निर्वाचित भए ?

महिला खुलातर्फ केन्द्रीय सदस्य पदमा उमेदवारी दिएका पोखराका दुई जना महिला नेतृहरुमध्ये पोखराकी लक्ष्मी पाण्डे निर्वाचित हुँदा पोखराकै नम्रता बराल भने पराजित भएकी छन् । यसैगरी, स्याङ्गजाकी कल्पना तिवारी, पर्वतकी मुना भुषाल, तनहुँकी चिनु पोखरेलले पनि विजय प्राप्त गरेको निर्वाचन समितिले जनाएको छ ।

गण्डकी भूगोलबाट काँग्रेस केन्द्रीय सदस्यमा किरणबाबु श्रेष्ठसहित तीन जना निर्वाचित भए । गण्डकी प्रदेशको प्रतिनिधित्व गर्दै खुला केन्द्रीय सदस्यमा किरणबाबु श्रेष्ठ, रेशमबहादुर बानियाँ र खुमाप्रसाद अर्याल निर्वाचित भएका हुन् ।

त्यसैगरी, गण्डकी प्रदेशको महिलातर्फ सरस्वती अर्याल तिवारी अत्यधिक मतका साथ केन्द्रीय सदस्यमा निर्वाचित भइन् । बाग्लुङकी रेनुका काउछामगर र जनजाती खुलातर्फ स्याङ्गजाका ई. अनुप श्रेष्ठ र बाग्लुङका भिम श्रीसमगर समेत विजयी भए ।

३५ वर्षमुनिको युवातर्फ गण्डकी प्रदेशबाट सबैभन्दा बढी मत प्राप्त गर्दै सुभाष पौडेल केन्द्रीय सदस्यमा निर्वाचित भएका छन् । ३५ वर्षमुनिको महिलातर्फ भने डा. कला पन्त निर्वाचित भएकी छन् ।