काठमाडौं । आयोजक सहारा क्लब पोखराले २५औं आहारारा पोखरा गोल्डकप फुटबलको उपाधि जितेको छ ।

पोखरा रंगशालामा शनिबार भएको फाइनलमा जावलाखेल युथ क्लबलाई २-० ले पराजित गर्दै आयोजक सहाराले १२ वर्षपछि उपाधि जितेको हो ।

ट्रफी हात पारेर आयोजक सहाराले गोल्डकपको रजत वर्षको सुखद अन्त्य पनि गरेको छ ।

सहाराको जितमा मुकुन्द निउरे र ताय दिनियलले एक-एक गोल गरे । २५औं मिनेटमा निउरेले गोल गर्दै अग्रता दिलाएका थिए भने ७३औं मिनेटमा दिनियलले गोल गर्दै अग्रता दोब्बर पारे ।

सहाराले पछिल्लोपटक वि.सं. २०७० सालमा उपाधि जितेको थियो । १२ वर्षपछि फाइनल पुग्दा सहाराले उपाधि जित्न सफल भयो । जावलाखेलले १४ वर्षपछि पुनः उपविजेतामा चित्त बुझाउनुपर्‍यो ।

उपाधि विजेता सहाराले १४ लाख रुपैयाँ पुरस्कार प्राप्त गरेको छ । उपविजेता जावलाखेलले ७ लाख १ हजार रुपैयाँमा चित्त बुझायो ।

माघ २७ गतेबाट सुरु भएको गोल्डकपमा १२ टोलीले सहभागिता जनाएका थिए । प्रतियोगिता सुरु भएको २५औं वर्ष भएकाले यस संस्करणलाई सिल्भर जुब्ली समेत भनिएको थियो ।

सो अवसरमा फ्लडलाइटमा खेल खेलाउने तय भएपनि २ दिनपछि प्राविधिक कारणले खेल दिउँसोलाई नै सारिएको थियो ।

प्रतियोगितामा ३ विदेशीसहित १२ टिम सहभागी थिए । सहाराले प्रि–क्वाटरमा हङकङको गोर्खा इन्टरनेस्नल फुटबल क्लबलाई १–०, क्वाटरफाइनलमा नेपाल पुलिस क्लबलाई र सेमिफाइनलमा मनाङ मर्स्याङ्दी क्लबलाई सडेन डेथमा पराजित गर्दै फाइनलको यात्रा तय गरेको थियो । जावलाखेलले प्रि–क्वाटरमा मच्छिन्द्र क्लब, क्वाटरफाइनलमा चर्च ब्वाइज र सेमिफाइनलमा उज्वेकिस्तानको आभा एफसीलाई पराजित गरेको थियो ।

मुकुन्दकुमार निउरे सर्वोत्कृष्ट खेलाडी

प्रतियोगिताको सर्वोत्कृष्ट खेलाडी (प्लेयर अफ द टुर्नामेन्ट) सहाराका मुकुन्दकुमार निउरे घोषित भएका छन् । उनले टेलजीको स्कुटर प्राप्त गरे ।

सर्वाधिक गोल स्कोरर प्लानिङ ब्वाइज युनाइटेडका पापा इबु कोवे ३ गोलसहित शीर्षमा रहे ।

उत्कृष्ट गोलकिपरमा सहाराका टिकेन्द्र थापा, उत्कृष्ट डिफेन्डरमा सहाराकै टाए डानियल, उत्कृष्ट मिडफिल्डरमा जावलाखेलका बौबोकार सिसोखो र उत्कृष्ट फर्वार्डमा जावलाखेलकै धरवेन्द्र कुँवर छानिए ।

उत्कृष्ट प्रशिक्षकको सम्मान सहाराका सुनिल राना मगरले पाए भने उदीयमान खेलाडीको पुरस्कार मुकुन्दकुमार निउरेले नै प्राप्त गरे ।

फेयर प्ले पुरस्कार उज्वेकिस्तानको आभा एफसीले हात पार्‍यो । विधागततर्फका खेलाडी र टिमले जनही २५ हजार रुपैयाँ प्राप्त गरे ।