काठमाडौँ — कांग्रेस सभापति गगन थापाले निर्वाचनबाट ठूलो मतका साथ विजयी भएको रास्वपालाई शुभकामना दिएका छन् ।

उनले चुनावले आफूहरूलाई प्रतिपक्षको भूमिका दिएको बताउँदै यो महत्वपूर्ण भूमिका भएको बताए । उनले भने, ‘सरकारसँग बढी ताकत भएका बेला प्रतिपक्षको झनै ठूलो भूमिका हुन्छ ।’ कांग्रेसको केन्द्रीय समिति बैठकमा बोल्दै थापाले यस्तो बताएका हुन् ।

उनले चुनावमा आफूहरू प्रतिज्ञा गरेर गएको भन्दै जनताको मतले सरकार सञ्चालन गर्ने भूमिका नदिए पनि संसदमा प्रतिपक्षको भूमिका दिएको बताए । उनले भने, ‘अबको ५ वर्षमा नेपालमा सुशासन र विकास पहिलेको भन्दा ५ गुणा बढी हुनुपर्छ । तर त्यो गतिमा लिएर जाने जिम्मा रास्वपाले पाएको छ । त्यसमा कांग्रेसको पूर्ण साथ रहन्छ । गति नपुगेका ठाउँमा प्रश्न हुन्छ ।’

उनले अबको ५ वर्ष कुनै पनि राजनीतिक दुर्घटना नहुनुपर्ने बताउँदै यसका निम्ति आफूहरू सचेत हुनुपर्ने पनि बताए । उनले भने, ‘सुशासनका विषयमा २०८२ भन्दा अघिका विषयलाई पनि टुंग्याउनुपर्छ । २०४६ पछि जतिपनि सरकारमा बनेका छन् र सार्वजनिक भूमिकामा बसेका सबैको सम्पत्ति छानबिन हुनुपर्छ र गैरकानुनी देखिए जफत हुनुपर्छ ।’ उनले रास्वपाले पनि यही कुरा भनेको भन्दै नयाँ बनेको सरकारले यो छानबिनका लागि आयोग बनाउनुपर्ने बताए ।