स्याङ्जाको भीरकोट नगरपालिका अन्तर्गत सञ्चालित भीरकोट नगर अस्पताल पछिल्लो समय उल्लेखनीय सुधारसहित स्थानीयको भरोसाको केन्द्र बन्दै गएको छ । व्यवस्थापनमा सुधार, सेवा विस्तार र स्वास्थ्य बीमा कार्यक्रमको प्रभावकारी कार्यान्वयनसँगै अस्पतालमा आउने सेवाग्राहीको संख्या ह्वात्तै बढेको हो ।

केही वर्षअघिसम्म न्यून बिरामी आउने यो अस्पताल अहिले दैनिक सयभन्दा बढी बिरामीले सेवा लिने अवस्थामा पुगेको छ । नगरपालिकाले स्वास्थ्य क्षेत्रलाई प्राथमिकतामा राख्दै अस्पतालको स्तरोन्नतिमा जोड दिँदा यस्तो परिवर्तन देखिएको हो ।

नगरप्रमुख गोविन्द कुमार कर्माचार्यका अनुसार अस्पतालमा भौतिक संरचना विस्तार, सेवा सुविधा वृद्धि र आधुनिक उपकरण जडानको काम तीव्र रूपमा अघि बढिरहेको छ । “अस्पताललाई अझ व्यवस्थित र सुविधासम्पन्न बनाउने हाम्रो लक्ष्य हो,” उनले भने ।

अस्पतालले आगामी जेठदेखि डायलोसिस सेवा सञ्चालन गर्ने तयारीसमेत गरेको छ । यसका लागि अत्याधुनिक दुईवटा मेसिन खरिद प्रक्रिया अगाडि बढाइएको छ । सेवा सुरु भएपछि मिर्गौला रोगी बिरामीलाई बाहिर जानुपर्ने बाध्यता कम हुने विश्वास गरिएको छ । साथै, भविष्यमा क्यान्सर उपचारका लागि रेडियोथेरापी सेवा विस्तार गर्ने योजना पनि अस्पतालले बनाएको छ ।

अस्पतालमा सुधारसँगै स्थानीयबासीमा सकारात्मक प्रभाव परेको छ । सामान्य उपचारका लागि समेत अन्यत्र धाउनुपर्ने अवस्था घट्दै गएको सेवाग्राहीहरू बताउँछन् । यसले समय र खर्च दुवै बचत भएको उनीहरूको अनुभव छ ।

यसैबीच, नगरपालिकाले विशेषज्ञ सेवासहित निःशुल्क स्वास्थ्य शिविर सञ्चालनलाई पनि निरन्तरता दिएको छ । मनमोहन मेमोरियल शिक्षण अस्पतालको सहकार्यमा गत चैत ७ गते गरिएको शिविरमा चार सयभन्दा बढी नागरिकले सेवा लिएका थिए । शिविरमा हाडजोर्नी, नसा, मानसिक स्वास्थ्य, नाक–कान–घाँटी, स्त्री तथा प्रसूति, जनरल मेडिसिन र दन्तसम्बन्धी सेवा उपलब्ध गराइएको अस्पतालले जनाएको छ ।

स्वास्थ्य शिविरका टोली प्रमुख डा. मनोहर सिङ सैयदले ग्रामीण क्षेत्रमा सहज रूपमा सेवा पुर्‍याउने उद्देश्यले यस्ता कार्यक्रमलाई निरन्तरता दिइएको बताए । त्यस्तै, पोखरास्थित फेवासिटी हस्पिटलका हाडजोर्नी विशेषज्ञ डा. दिनेश वि.क.ले विपन्न बिरामीलाई निःशुल्क उपचार गर्ने प्रतिबद्धता जनाएका छन् ।

हाल अस्पतालमा ओपीडी, फार्मेसी, प्रयोगशाला, एक्स-रे, अल्ट्रासाउन्ड, सामान्य शल्यक्रिया, दन्त सेवा, परिवार नियोजन, गर्भजाँच, प्रसूति सेवा तथा क्षयरोग परीक्षण जस्ता सेवाहरू नियमित सञ्चालनमा छन् । साथै, २४ घण्टा आपतकालीन, फार्मेसी र प्रसूति सेवा उपलब्ध हुनु अस्पतालको अर्को विशेषता हो ।

भीरकोट अस्पतालबाट अहिले अर्जुनचौपारी गाउँपालिका, पुतलीबजार नगरपालिका लगायत आसपासका क्षेत्रका नागरिकले सेवा लिइरहेका छन् । तीनवटै पालिकाबीच समन्वय गरी जनशक्ति थप्ने र स्वास्थ्य बीमा कार्यक्रमलाई अझ प्रभावकारी बनाउने तयारी भइरहेको छ ।

अस्पतालले अक्सिजन उत्पादनमा आत्मनिर्भरता हासिल गर्नुका साथै परिसरको सरसफाइ र बगैंचा व्यवस्थापनमा सुधार ल्याएर वातावरणलाई समेत आकर्षक बनाएको छ ।

समग्रमा, भीरकोट नगर अस्पतालले पछिल्लो समय देखाएको परिवर्तनले स्थानीय तहमै गुणस्तरीय स्वास्थ्य सेवा सम्भव छ भन्ने सन्देश दिएको छ । आगामी दिनमा थप सुविधा विस्तारसँगै अस्पताल जिल्लाकै नमुना स्वास्थ्य संस्थाका रूपमा स्थापित हुने अपेक्षा गरिएको छ ।