स्याङ्जाको बालमैत्री स्थानीय तह भीरकोट नगरपालिकाले विद्यार्थी लक्षित बिमा कार्यक्रम सञ्चालन गर्ने भएको छ । नगरपालिकाको वडा नं–८ बाट सुरु हुने यो कार्यक्रम आगामी शैक्षिक सत्र २०८३ देखि लागू गरिने जनाइएको छ ।

वडा अध्यक्ष नन्दलाल खनालका अनुसार वडाभित्रका सबै विद्यालयमा अध्ययनरत तथा स्थायी बसोबास भएका विद्यार्थीलाई निःशुल्क स्वास्थ्य बिमाको व्यवस्था गरिँदैछ । बालबालिकालाई सुरक्षित र स्वास्थ्य सेवा पहुँचमा सहज बनाउने उद्देश्यसहित कार्यक्रम अघि सारिएको उनले बताए ।

उनका अनुसार दुर्घटना वा बिरामी पर्दा उपचार खर्चको चिन्ता बिना सेवा लिन सकून् भन्ने सोचका साथ बिमा कार्यक्रम ल्याइएको हो । यसका लागि चालू आर्थिक वर्ष २०८२/८३ मा वडाले पाँच लाख रुपैयाँ बजेट विनियोजन गरेको छ ।

कार्यक्रम शिखर इन्स्योरेन्ससँगको सहकार्यमा सञ्चालन हुनेछ । बिमामा आबद्ध विद्यार्थीले तोकिएका स्वास्थ्य संस्थाबाट उपचार गर्दा एक लाख रुपैयाँसम्मको खर्च सुविधा पाउनेछन् । अन्य अस्पतालमा उपचार गराए पनि बिलका आधारमा रकम भुक्तानी हुने व्यवस्था मिलाइएको खनालले जानकारी दिए ।

नगर प्रमुख गोविन्दकुमार कर्माचार्यले यो कार्यक्रमले विद्यार्थीको स्वास्थ्य अधिकार सुनिश्चित गर्न महत्वपूर्ण भूमिका खेल्ने विश्वास व्यक्त गरे । उनले आगामी वर्षदेखि नगरका अन्य वडामा पनि कार्यक्रम विस्तार गर्ने तयारी रहेको बताए ।

नगरपालिकाले वैशाख २०८३ देखि करिब ६ सय विद्यार्थीलाई बिमा गर्ने लक्ष्य राखेको छ । प्रत्येक विद्यार्थीका लागि १५० रुपैयाँ प्रिमियम वडाले नै व्यहोर्नेछ । बिमा अवधिभित्र कुनै विद्यार्थीको मृत्यु भएमा एक लाख रुपैयाँसम्मको राहत उपलब्ध गराइने व्यवस्था पनि गरिएको छ ।