घटना १ः
यही साउन २३ गते फेवातालको ड्याम मुनि पौडी खेल्दा म्याग्दी जिल्ला मंगला गाउँपालिका वडा नं. ३ बरञ्जा खर्क (कलेजीगौरा) घर भई हाल पोखरा २९ ठुलोखोर लेखनाथ बस्दै आएका गाडीका हेल्पर २४ वर्षीय विकास भुषाल पातालेछाँगो तिर बगे । अझै वेपत्ता छन् ।

घटना २ः
तीन दिन लगत्तै साउन २६ गते साथीहरुसँगै सोहि ठाउँमा पौडी खेल्न गएका पोखरा काठमाण्डौ टुरिस्ट बसका परिचालक ओखलढुंगाका २० वर्षीय अबिन राई पौडी खेल्ने क्रममा बगे । उनको पनि अत्तोपत्तो छैन ।

घटना ३ः
साउन २७ गते आइतबार बराल फिडबाट नजिकै डेविज फलमाथि शव भेटियो । पुरुष शवको पहिचान हुन सकेको छैन ।

वडा प्रहरी कार्यालय बैदामका प्रमुख डिएसपी नविन कार्कीका शव फुलिएर नचिनिने अवस्थामा छ । गत असार २२ गतेदेखि सम्पर्कविहीन भारतीय युवक भएको आशंकामा उनका परिवारलाई खबर गरिएको थियो । मंगलबार आएका उनका परिवारले समेत ठम्याउन नसकेकाले डिएनए परीक्षण गरिने कार्कीले बताए ।

होटल ग्राण्डमा वैवाहिक कार्यक्रममा मिठाइ बनाउने कालीगढका रुपमा दिल्लीबाट आएका ३० वर्षीय महेश रौटेला असार २२ गते दिउँसो २ बजे सोहि ठाउँमा पौडी खेल्न जाँदा बेपत्ता भएका थिए । उनका परिवार आएर चार दिन खोजतलास गर्दा पनि नभेटेपछि फर्किएका थिए ।

एक सातामै सोहि ठाउँमा बेपत्ता हुने र शव फेला पर्ने तीन जनाको समाचार बनिसकेको छ । अब सो ठाउँलाई पौडी निषेधित क्षेत्र घोषणा गर्न स्थानीय सरकार, प्रहरी र प्रशासनको ध्यान जान जरुरी छ।