पोखरामा रोकिराखेको बोलेरो जिपमा स्कुटर ठोक्किँदा स्कुटरमा सवार दुई युवाको ज्यान गएको छ ।

पोखरा महानगरपालिका–५ जिरो किलोमिटर नजिक आज (शुक्रबार) दिउँसो भएको दुर्घटनामा स्कुटरमा सवार दुवै जनाको ज्यान गएको जिल्ला प्रहरी कार्यालय कास्कीले जनाएको छ ।

मृत्यु हुनेमा म्याग्दीको मंगला गाउँपालिका–दारुङ घर भएका २१ वर्षीय विवेक दर्जी र म्याग्दीकै रघुगंगा गाउँपालिका–३ निवासी २६ वर्षीय मोहन परियार रहेको जिल्ला प्रहरी कार्यालय कास्कीका सहायक सूचना अधिकारी प्रहरी निरीक्षक दीपकप्रसाद रिजालले जानकारी दिए ।

टाउको र आँखामा गम्भीर चोट लागेका विवेकलाई उपचारका लागि मणिपाल शिक्षण अस्पताल लगिएकोमा दिउँसो ३ः५० बजे चिकित्सकले मृत घोषणा गरे ।

टाउकोमा चोट लागेका मोहनलाई पश्चिमाञ्चल क्षेत्रीय अस्पताल लगिएकोमा दिउँसो ३ः१० बजे चिकित्सकले उहाँलाई मृत घोषणा गर्नु भएको थियो ।

उनीहरू ग २३ प १७१६ नम्बरको स्कुटरमा सवार थिए । सडकमा रोकेर राखिएको  लु ३ च ५२७४ नम्बरको बोलेरो जिपमा पछाडि ठोक्किएका थिए ।

प्रहरीले दुर्घटनाग्रस्त स्कुटर, बोलेरो जिप र बोलेरो चालक पोखरा महानगरपालिका–२८ कालिका निवासी ४८ वर्षीय अमृत बजगाईंलाई नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ ।