निकै घातक बनिरहेको कोरोना संक्रमणका कारण नेपालमा प्रत्येक एक घण्टामा नौ जना संक्रमितको मृत्यु भइरहेको छ। स्वास्थ्य तथा जनसंख्या मन्त्रालयले पछिल्लो २४ घन्टामा थप २ सय २५ जना संक्रमितको मृत्यु पुष्टि गरेको छ।

नेपालमा हालसम्म कोरोना संक्रमणबाट ४ हजार ८४ जनाले ज्यान गुमाएका छन्। स्वास्थ्य मन्त्रालयको अनुसार पछिल्लो २४ घन्टामा २१ हजार ३१६ नमुना परीक्षणमा ९४८३ जनामा संक्रमण पुष्टि भएको छ। योसँगै नेपालमा कुल संक्रमितको संख्या ४ लाख १३ हजार १ सय ११ पुगेको छ।

मंगलबार पनि गण्डकीमा थप १२ जनाको मृत्यु पुष्टि भएको छ । मृत्यु पुष्टि भएका १२ जनासंगै गण्डकीमा कोरोना संक्रमणका कारण ज्यान गुमाउनेको संख्या २८८ पुगेको  छ ।

गण्डकीमा कोरोना संक्रमितको कूल संख्या २४ हजार ५०६ पुगेको छ । जसमा ६ हजार ३३ सक्रिय संक्रमित छन्। पछिल्लो २४ घण्टामा ६२४ जनामा कोरोना संक्रमण पुष्टि भएको छ। गण्डकीबाट ११२ जना कोरोनामुक्त भएका छन् । योसंगै, प्रदेशमा कोरोनामुक्त हुनेको संख्या १८ हजार १८५ पुगेको छ।