प्रतिनिधिसभा पुनर्स्थापना गर्ने सर्वोच्च अदालतको फैसला प्रति विपक्षी गठबन्धनले स्वागत गरेको छ भने प्रधानमन्त्री केपी शर्मा ओली समूहले आपत्ति जनाएको छ। काँग्रेस सभापति शेरबहादुर देउवालाई २ दिनभित्र प्रधानमन्त्री बनाउन परमादेश नै दिएपछि काँग्रेसले दिल खोलेर स्वागत गरेको छ । देउवा निवासमा बधाई दिने भिड समेत लागिसकेको छ ।

ओली समूहले भने उक्त निर्णयले राजनीतिक अस्थिरता बढ्ने भन्दै आन्दोलनको चेतावनी दिएको छ। युवा संघले अदालतको फैसला कार्यान्वयन नगर्न भन्दै आन्दोलन घोषणा गरेको छ। ओली निकट नेता महेश बस्नेतले आन्दोलनका लागि आह्वान समेत गरेका छन्।

यसअघि नै असार १८ र १९ गते बालुवाटारमा सम्पन्न एमालेको केन्द्रीय कमिटीको बैठकमा ओलीले आन्दोलनका लागि तयार रहन निर्देशन दिएका थिए।

ओली समूहका नेता तथा लुम्बिनी प्रदेशका मुख्यमन्त्री शंकर पोखरेलले अदालतको फैसलाले अस्थिरता बढाउने बताएका छन्। ुसंसदीय व्यवस्था र दलीय प्रणालीमाथि गम्भीर आघात। सुदुर भविष्यसम्म नेपाल राष्ट्र र नेपाली जनतादे अस्थिरताको दुश्चक्र वेहोर्नु पर्नेभो’ पोखरेलले भनेका छन्।

यस्तै, विपक्षी गठबन्धनले भने अदालतको फैसलाको स्वागत गरेको छ। गठबन्धनमा आवद्ध राजनीतिक दल नेपाली कांग्रेस, माओवादी केन्द्र, एमालेको माधवकुमार नेपाल समूह, जनता समाजवादी पार्टी जसपा र राष्ट्रिय जनमोर्चाले अदातले ओलीको गैर संवैधानिक निर्णयलाई सच्याएको बताएका छन्। औपचारिक धारणा सार्वजिनक गर्न गठबन्धनको सिंहदरबारमा बैठक बस्दै छ।