ट्रक चालकको मनमा पाप जाग्दा नाबालक सहित उनका बाबुले अनाहकमा ज्यान गुमाउनुपरेको छ । मोटरसाइकल चालक घाइते भएका छन् ।

धादिङको थाक्रे गाउँपालिका-६, महादेवबेशीमा मंगलबार ट्रकले मोटरसाइकललाई ठक्कर दिँदा दुई जनाको मृत्यु भएको हो ।

नौबिसेतर्फबाट गल्छीतर्फ जाँदै गरेको ना ४ ख ९४४ नम्बरको ट्रकले बा ७३ प २१७६ नम्बरको मोटरसाइकललाई ठक्कर दिँदा मोटरसाइकलमा सवार नुवाकोटको बिदुर नगरपालिका-१३ का ३५ वर्षिय नारायण शिवभक्ति र उनका छोरा १० वर्षीय आर्यन शिवभक्तिको मृत्यु भएको धादिङ प्रहरीले जनाएको छ । बाबुको उपचारको क्रममा काठमाडौस्थित ट्रमा सेन्टर र छोराको घटनास्थलमा मृत्यु भएको हो ।

दुर्घटनामा मोटरसाइकलका चालक धादिङको त्रिपुरासुन्दरी गाउँपालिका घर भएका २० वर्षिय जीवन घर्ती घाइते छन् । घाइतेको ट्रमा सेन्टरमा उपचार भैरहेको छ । मोटरसाइकललाई ब्याक गरी  ठक्कर दिएर भाग्ने ट्रकलाई प्रहरीले सिम्लेबाट नियन्त्रणमा लिएको छ ।

ओभरटेक गर्न लाग्दा आफ्नै साइडमा आइरहेको मोटरसाइकललाई ट्रकले ठक्कर दिँदै लछारेको थियो । त्यसपछि बाइक र सवार ३ जना सडकमा लडेका थिए । ट्रक चालकले पुनः ब्याक गरेर मान्छेमाथि टायर चढाएको भिडियोमा स्पष्ट देखिन्छ । चालकले प्रत्यक्षदर्शीले रोक्न खोज्दा पनि ट्रक हुईकाएका थिए ।

भिडियो हेर्न यहाँ क्लिक गर्नुहोस्