कांग्रेस निकट तीन प्रदेश प्रमुखलाई पदमुक्त गर्दै सरकारले नयाँ नियुक्त गर्न राष्ट्रपतिसमक्ष सिफारिस गरेको छ ।
सोमबार बसेको मन्त्रिपरिषद् बैठकले गण्डकी, मधेस र सुदूरपश्चिम प्रदेशका कांग्रेस निकट प्रदेश प्रमुखलाई हटाएर नयाँ नियुक्तिको लागि राष्ट्रपति रामचन्द्र पौडेलसमक्ष सिफारिस गर्ने निर्णय गरेको हो ।
नयाँ प्रमुखमा मधेसका लागि सुमित्रा भण्डारी, गण्डकीका लागि डिल्लीराज भट्ट र सुदूरपश्चिमका नजिर मियाँ सिफारिस भएका छन् ।
यसअघि मधेश प्रदेशको प्रमुखमा हरिशंकर मिश्र, गण्डकीका प्रमुखमा पृथ्वीमान गुरुङ र सुदूरपश्चिम प्रदेशका प्रमुखमा देवराज जोशी थिए। उनीहरू तिनै जना तत्कालीन सत्ता साझेदार दल कांग्रेससँग निकटताका आधारमा नियुक्त भएका थिए।
प्रवक्ता तथा सञ्चार मन्त्री रेखा शर्माले प्रदेश र केन्द्र सरकारबीच समन्वय जरुरी हुने भएकाले पदमुक्त र नयाँ नियुक्तिको निर्णय लिइएको बताइन्। ‘राजनीतिक रुपमा सहज होस्। प्रदेश र केन्द्रबीचको राजनीतिक दृष्टिकोण समान बनोस् भन्ने उद्देश्यले यो गरिएको हो’, उनले भनिन्।
कोशी, बागमती, लुम्बिनी र कर्णाली प्रदेशका प्रदेश प्रमुखलाई यथावत् राखिएको छ ।
नयाँ नियुक्तिका लागि सिफारिस गरिएका प्रदेश प्रमुखहरू तीनैजना नेकपा एमालेका हुन् । भट्ट डोटीका पुराना नेता हुन् र उनी नेकपा एमालेका सल्लाहकार परिषद सदस्य छन् । उनी राष्ट्रियसभाको अघिल्लो निर्वाचनमा उम्मेदवार बनेका थिए । हाल डिल्लीराज भट्ट धनगढी बस्दै आएका छन् ।
झापाकी सुमित्रा भण्डारी केपी शर्मा ओली प्रधानमन्त्री भएका बेला डेनमार्कको लागि राजदूत सिफारिस भएर पनि सरकार ढलेपछि नियुक्ति नपाएकी महिला नेता हुन् ।
प्राध्यापक पेशाबाट अवकाश पाएकी भण्डारी एमाले निकट अखिल नेपाल महिला संघकी नेतृ हुन् । अर्घाखाँचीका नजिर मिया नेकपा एमालेका केन्द्रीय सल्लाहकार तथा संविधानसभा सदस्य हुन् । उनी नेपाल मुस्लिम इत्तेहाद संगठनका पूर्वअध्यक्ष हुन् ।
सम्बन्धित खबर
पौडी खेल्दा बबईमा डुबेर दाजुभाइको मृत्यु
आज देशभरको मौसम कस्तो रहन्छ?
शिक्षकको तलब मासिक रूपमा दिने सरकारको घोषणा
इतिहासकार ज्ञानमणि नेपालको निधन
१७ दिनकी सुत्केरीको हत्या, श्रीमान् पनि मृत फेला
गणतन्त्र दिवस मौलिक रूपमा मनाउन प्रधानमन्त्रीको निर्देशन
यो पनि पढौँ
स्याङ्जामा विवाहकै दिन बेहुलाबेहुली पक्राउ
जनकपुरको होटलमा बेहोस भेटिएकी पोखराकी युवतीको मृत्यु, सँगै बसेका २ युवक फरार
आँखामा राख्दा पनि नबिझाउने ‘बिनोद सर’ अब सम्झनामा
बालकुमारीमा मारिएकाका परिवारलाई कोरियाबाट आर्थिक सहयोग