नेकपा (एमाले)ले मुलुकमा भइरहेका प्रतिगामी हर्कतविरूद्ध जनतालाई सचेत पार्दै सङ्घीय लोकतान्त्रिक गणतन्त्रको पक्षमा जनमत सिर्जना गर्न देशव्यापी जनसचेतना अभियान सञ्चालन गर्ने भएको छ ।

सरकारमै रहेको नेपाली कांग्रेसले समेत राजा फर्काउने गतिविधिको विरोध गरिरहेको छ । कांग्रेसले चैत १० गते केन्द्रीय कार्यसम्पादन समितिको बैठक राखेर विकसित राजनीतिक घटनाक्रमबारे थप निर्णय गर्ने तयारी समेत गरेको छ ।

एमालेले चैत ११ गते एकैदिन एकै समय देशैभरि सबै वडामा जनसचेतना कार्यक्रमको घोषणा गरेको हो । यसैगरी तीन महिने वडा केन्द्रित अभियान चलाइरहेको एमालेले चैत ११ गते नै देखि चैत ३० गतेसम्म सबै प्रदेश र जिल्लामा प्रतिगामी हर्कतविरूद्ध जनपरिचालन, जनसचेतना कार्यक्रम समेत आयोजना गर्ने निर्णय गरेको महासचिव शंकर पोखरेलले बताए ।

यस क्रममा चैत १८ गते धनगढी, सुर्खेत, बुटवल, पोखरा, वीरगन्ज र दमकमा मोटर साइकल र्‍योली आयोजना गरिने छ । एमालेले चैत १८ गते सबै जिल्लामा जिल्लास्तरीय जागरण सभा आयोजना गर्ने भएको छ भने चैत २४ देखि ३० गतेसम्म बाग्मती बाहेकका छ वटै प्रदेशका सहरहरू धनगढी, सुर्खेत, बुटवल, पोखरा, वीरगन्ज र दमकमा विशेष प्रदर्शन र जनसभा गर्ने उनको भनाइ छ ।

माओवादी केन्द्रसहित विपक्षी चार दलीय मोर्चाले समेत प्रतिगामी तथा पश्चगामी शक्तिका गतिविधिसहित सरकारका गलत क्रियाकलापविरुद्ध चैत १५ गते काठमाडौँमा शक्ति प्रदर्शन गर्ने घोषणा गरिसकेको छ ।

सरकारमै रहेको नेपाली कांग्रेसले समेत राजा फर्काउने गतिविधिको विरोध गरिरहेको छ । कांग्रेसले चैत १० गते केन्द्रीय कार्यसम्पादन समितिको बैठक राखेर विकसित राजनीतिक घटनाक्रमबारे थप निर्णय गर्ने तयारी समेत गरेको छ ।