जेन–जी नेता मिराज ढुंगानाले ९ अक्टोबरमा कुनै किसिमको आन्दोलनको कार्यक्रम तय नभएको प्रस्ट पारेका छन् ।

अहिले सामाजिक सञ्जालमा ९ अक्टोबरमा जेन–जीको विशाल प्रदर्शन हुने भन्दै प्रचार गरिएको छ । उक्त प्रचार खारेज गर्दै ढुंगानाले प्रदर्शनको कुनै तयारी नभएको बताए ।

टिकटकमा भिडियो सन्देश जारी गर्दै मिराजले देशमा कायम भएकाे शान्ति विथोल्न आफूहरूले नचाहने बताएका छन् । उनले भनेका छन्, ‘धेरैले मलाई अक्टाेबर ९ काे विषयमा साेधिरहनुभएकाे छ । म प्रस्ट्याउन चाहन्छु– अक्टाेबर ९ मा कुनै पनि हिंसात्मक गतिविधि गर्ने याेजना छैन । त्यस्ताेमा हामी संलग्न हुँदैनाैँ ।’

उनले एजेन्डाबिना कुनै पनि आन्दाेलन गर्नुकाे औचित्य नहुने पनि बताएका छन् । २३ भदाैको आन्दोलनमा मुसा मार्न जाँदा बाघ मारिएको उनले बताएका छन् । ‘हामी मुसा मार्न गएका थियाैँ । बाघ मारेर ल्यायौँ । अब बाघ बाेकेर ल्याउन सकिँदैन जंगलबाट । त्यस्ताे अवस्था थियाे’, मिराज भन्छन्, ‘एजेन्डाबिना हामी कुनै पनि खालकाे प्रदर्शनमा भाग लिदैनाैँ । देशमा बनिसकेकाे शान्ति फेरि भंग गर्नेवाला छैनाैँ ।’