सरकारले केपी शर्मा ओली र पुष्पकमल दाहाल प्रचण्डसहित पूर्वप्रधानमन्त्रीहरूको सुरक्षामा खटिएका केही सुरक्षाकर्मी फिर्ता गरेको छ । मापदण्डभन्दा बढी संख्यामा सुरक्षाकर्मी प्रयोग भएको भन्दै गृहमन्त्रीस्तरीय निर्णयमार्फत उनीहरूको सुरक्षा टोली घटाइएको हो ।

स्रोतका अनुसार ओलीका २७ र प्रचण्डका ३४ जना सुरक्षाकर्मी फिर्ता गराइएका छन् । गृहमन्त्री ओमप्रकाश अर्यालकै जोडबलमा यो निर्णय भएको बताइएको छ । गृहमन्त्री अर्यालले आजै दिउँसो तीनवटै सुरक्षा निकायका प्रमुखहरूसँग छलफल गरेका थिए ।

आज दिउँसो ओलीले भक्तपुरमा आयोजित कार्यक्रममा सरकारको चर्को आलोचना गरेका थिए । उनले गृहमन्त्री अर्याललाई सत्ता चलाउन सजिलो नरहेको भन्दै कटाक्ष गरेका थिए । प्रधानमन्त्री सुशीला कार्कीसँग डराएर आफू नभाग्ने पनि ओलीले बताएका थिए ।

ओलीको बिहीबारको भाषणपछि गृहमन्त्री अर्याल उनीप्रति थप रुष्ट बनेको गृहका अधिकारीहरूले बताएका छन् ।