स्याङ्जामा सम्पन्न १४ औँ जिल्ला स्तरीय राष्ट्रपति रनिङ शिल्ड प्रतियोगिताको उपाधि गल्याङ नगरपालिकाले हात पारेको छ । पुतलीबजार नगरपालिका–१ मा शुक्रबारदेखि सञ्चालन भएको प्रतियोगितामा उत्कृष्ट प्रदर्शन गर्दै गल्याङले लगातार दोस्रो वर्ष पनि शिल्ड जित्न सफल भएको हो ।

जिल्ला खेलकुद विकास समिति स्याङ्जाको आयोजनामा सञ्चालित प्रतियोगितामा गल्याङले १० स्वर्ण, पाँच रजत र सात कास्य पदक जित्दै समग्र विजेता बन्यो । प्रतियोगितामा पुतलीबजार नगरपालिकाले १० स्वर्ण जिते पनि चार रजत र पाँच कास्य पदकसहित उपविजेतामा सीमित रह्यो ।

त्यस्तै, वालिङ नगरपालिका सात स्वर्ण, १६ रजत र १० कास्य पदकसहित तेस्रो र पाँच स्वर्ण, सात रजत र छ कास्य पदकसहित फेदीखोला गाउँपालिका चौथो स्थानमा सीमित भएको जिल्ला खेलकुद विकास समिति स्याङ्जाका अध्यक्ष प्रकाश रेग्मीले जानकारी दिए ।

विजेता विद्यार्थीलाई रनिङ शिल्ड, मेडल तथा प्रमाणपत्र प्रदान गरिएको थियो । विभिन्न विधामा उत्कृष्ट प्रदर्शन गर्ने खेलाडीहरूले बागलुङमा हुने प्रदेशस्तरीय प्रतियोगितामा सहभागिता जनाउनेछन् ।

जिल्लाका ११ पालिकामध्ये हरिनास गाउँपालिकाबाहेक अन्य १० पालिकाका माध्यमिक तहमा अध्ययनरत विद्यार्थी प्रतियोगितामा सहभागी थिए ।

एथलेटिक्सअन्तर्गत विभिन्न दुरीका दौड, रिले दौड, सर्टपुट, ज्याभलिन थ्रो, लङजम्प, हाइजम्प, ट्रिपल जम्पसँगै कबड्डी, भलिबल र कराते लगायतका विधामा प्रतिस्पर्धा भएको थियो ।