राष्ट्रिय स्वतन्त्र पार्टीका बरिष्ठ नेता बालेन्द्र शाह (बालेन) भोलि देशको प्रधानमन्त्री नियुक्त हुँदैछन् । उनी बिहीबार पार्टीको संसदीय दलको बैठकबाट सर्वसम्मत संसदीय दलको नेतामा चयन भएपछि प्रधानमन्त्री नियुक्तिको बाटो खुलेको हो ।

अब भोलि राष्ट्रपति रामचन्द्र पौडेलले बालेनलाई प्रधानमन्त्री नियुक्त गर्दैछन् । संवैधानिक व्यवस्था अनुसार बहुमत प्राप्त संसदीय दलको नेतालाई राष्ट्रपतिले प्रधानमन्त्री नियुक्त गर्नेछन् ।

प्रधानमन्त्री नियुक्तिका लागि रास्वपाले अब संसदीय दलको नेतामा बालेनलाई निर्वाचित गराएको विषय समावेश गरी पत्र राष्ट्रपति कार्यालयमा पठाउने छ । सोही पत्रका आधारमा बालेन नयाँ प्रधानमन्त्री हुनेछन् ।

रास्वपाले राष्ट्रपति कार्यालयलाई पठाउने पत्रमा नेपालको संविधान २०७२ को धारा ७६ (१) बमोजिम आफ्नो संसदीय दलको नेतालाई प्रधानमन्त्री नियुक्त गरियोस् भन्ने ब्यहोरा खुलाउनुपर्ने संवैधानिक व्यवस्था छ । त्यस्तो पत्र पाएपछि राष्ट्रपतिले संसदीय दलको नेतालाई प्रधानमन्त्री नियुक्त गर्नेछन् ।

अहिले राष्ट्रपति कार्यालय शीलत निवास प्रधानमन्त्री नियुक्तिका लागि पूर्ण तयारी छ । यसअघिकै तयारी अनुसार भोलि चैत १३ गते शुक्रबार रामनवमीको दिन पारेर बालेनसहितका नवनियुक्त मन्त्रीले शपथ लिने छन् ।

शपथ ग्रहण समारोहमा संवैधानिक अंगका प्रमुख, पूर्वप्रधानमन्त्रीहरु, नेपाल सरकारका विशिष्ट र प्रथम श्रेणीका कर्मचारी, विभिन्न राजनीतिक दलका प्रमुख, सुरक्षा निकायका प्रमुखलाई निमन्त्रणा गरिने प्रचलन छ । यही प्रचलन अनुसार निमन्त्रणा गरिएको राष्ट्रपति कार्यालयले जनाएको छ ।

यसअघि, संसदीय दल बैठक अघि पार्टीको केन्द्रीय समितिले संसदीय दल गठनको प्रस्ताव सर्वसम्मत रूपमा पारित गरेकाे छ ।

बिहीबार पार्टी मुख्यालयमा बसेकाे केन्द्रीय समितिले बैठकले संसदीय दल गठनको प्रस्ताव सर्वसम्मत रूपमा पारित गरेकाे हाे ।

पार्टी सभापति रवि लामिछानेले वरिष्ठ नेता बालेनलाई संसदीय दलको नेता चयन गर्न गरेकाे प्रस्ताव केन्द्रीय समितिबाट सर्वसम्मत रूपमा पारित भएकाे हाे ।

सभापति लामिछानेको अभिव्यक्तिसँगै केन्द्रीय समितिको बैठक सकिएकाे प्रवक्ता मनिष झाले जानकारी दिए ।