सरकारले भदौ २३ गतेको हिंसाको आरोपित भन्दै तत्कालिन प्रधानमन्त्री केपी ओली र गृहमन्त्री रमेश लेखकलाई गिरफ्तार गरेसँगै कांग्रेसभित्रको आन्तरिक विवाद फेरि सतहमा आएको छ ।

पुसको अन्तिमसाता काठमाडौंमा भएको विशेष महाधिवेशन विवाद सर्वोच्च अदालतमा विचाराधिन रहेका बेला एमाले अध्यक्षसमेत रहेका पूर्व प्रधानमन्त्री ओली र कांग्रेस नेतासमेत रहेका तत्कालिन गृहमन्त्री लेखक पक्राउपछि कांग्रेसका दुबै समूह सहतमा देखिएका हुन् ।

शनिबार बिहान ओली र लेखक पक्राउपछि कांग्रेसका धारणा बारे चासो र चर्चा भइरहेका बेला पूर्णबहादुर खड्का र देवराज चालिसेले साँझ अलग अलग विज्ञप्ति जारी गरेका छन् ।

खड्काले १४औं महाधिवेशनको निरन्तरताका रुपमा कार्यवाहक सभापतिकै हैसियतमा विज्ञप्ति जारी गरेका छन् भने चालिसेले विशेष महाधिवेशनबाट निर्वाचित केन्द्रीय समितिको तर्फबाट पार्टीको धारणा सार्वजनिक गरेका छन् ।

चालिसेले सरकार संयमित नभए देश पुनः द्वन्द्व र अस्थिरतातर्फ जानसक्ने चिन्ता व्यक्त गर्दै पाँच बुँदे धारणा बाहिर ल्याएको छ । सरकारलाई उत्तेजनामा नआउन आग्रह गर्दै चालिसेद्वारा जारी विज्ञप्तिमा भनिएको छ, ‘भदौ २३ र २४ का घटनाका सम्बन्धमा सम्बन्धित व्यक्ति तथा संस्थाहरूको निष्पक्ष, पारदर्शी र विधिसम्मत ढंगले अनुसन्धान, अभियोजन लगायत सम्पूर्ण कानुनी प्रक्रिया अगाडि बढाइनुपर्छ भन्नेमा नेपाली कांग्रेस स्पष्ट छ ।’

भदौ २३ गतेको घटनामा संलग्न सँगै २४ गतेको आगजनी र विध्वंशमा संलग्न को थिए भन्ने पनि जनताले थाहा पाउनु पर्ने जनाउँदै दुवै दिनको घटनामा संलग्न जो सुकै भएपनि कारबाही हुनुपर्ने र त्यसमा पार्टीको सहयोग रहने जनाइएको छ ।

तर खड्काद्वारा जारी विज्ञप्तिमा पूर्वप्रधानमन्त्री ओली र पूर्वगृहमन्त्री लेखक पक्राउ प्रकरणको संवैधानिक, कानुनी र राजनीतिक रूपमा प्रतिवाद जनाएको छ । आगामी दिनमा आइपर्ने जुनसुकै परिस्थितिको राजनीतिकरुपमा सामना गर्न पार्टीका नेता तथा कार्यकर्तालाई तयार रहन उनले आग्रह गरेका छन् ।

‘सरकार गठन भएलगत्तै दुराशयपूर्ण तवरबाट भएको यस राजनीतिक प्रतिशोधले सरकार संविधान र लोकतन्त्रको प्रतिबद्धताबाट पछाडि हट्न पुगेको देखिन्छ,’ खड्काद्वारा जारी विज्ञप्तिमा भनिएको छ ।

आयोगको प्रतिवेदन कार्यान्वयनका नाममा प्रतिवेदनको पेज नं ७२१ को सिफारिसबमोजिम अनुसन्धान तहकिकात र अभियोजन गर्न गराउन नेपाल सरकारलाई सिफारिस गरी पठाउने भनिएकामा कुनै प्रक्रिया पूरा नगरी तत्कालिन सरकारका पदाधिकारीहरूलाई पक्राउ गर्नु कानुनी राज्यको बर्खिलाप र राजनीतिकरूपमा पूर्वाग्रह प्रेरित रहेको जनाइएको छ ।

‘आयोगको कार्यादेशबमोजिम भदौं २३ र २४ गते दुवै दिनको घटनाको छानबिन गर्नु पर्नेमा भदौ २४ गतेको घटनाबाट भएको मानवीय क्षति, सरकारी संरचनाको क्षति, राजनीतिक दलका कार्यालयहरू र व्यापारिक प्रतिष्ठान तथा निजी सम्पत्ति माथि भएको नोक्सानी र संलग्न व्यक्तिहरूबारे बिल्कुल मौन रहनुबाट पनि यो प्रतिवेदन पक्षपातपूर्ण भएको प्रष्ट छ,’ भनिएको छ ।

पार्टी केन्द्रीय कार्यालयमा गगनकुमार थापा नेतृत्वको कार्यसमितिले नवनिर्वाचित प्रतिनिधिसभा सदस्यहरूलाई प्रशिक्षणपछि विज्ञप्ति जारी गरेको हो । खड्काको नेतृत्वमा ठमेलको रमादा होटलमा शनिबार बैठक बसेर धारणा बनाइएको हो । चालिसे र खड्काद्वारा जारी फरक फरक विज्ञप्तिको लेडर प्याडमा पनि अलग अलग छन् ।