आर्थिक अभावका कारण लामो समयसम्म उपचार गर्न नपाएका बिरामीहरूले गाउँमै विशेषज्ञ सेवा पाएपछि राहत महसुस गरेका छन् ।

स्याङ्जाको अर्जुनचौपारी गाउँपालिका–४ का ५८ वर्षीय होमनाथ चपाईले चार वर्षदेखि मुटुको समस्याबाट पीडित भए पनि उपचार गर्न नसकिरहेको अवस्थामा पहिलो पटक आफ्नै गाउँ नजिकै सेवा पाएका हुन् ।

वडा नम्बर–४ को खेवाङमा आयोजित निःशुल्क स्वास्थ्य शिविरमा मुटुरोग विशेषज्ञ डा. नारायण गौतमबाट परीक्षण गराएपछि चपाईले खुशी व्यक्त गरे । उनले आर्थिक अभावका कारण उपचार नै नपाएर ज्यान जोखिममा पर्ने डर भएको अवस्थामा गाउँमै सेवा पाउँदा ठूलो राहत मिलेको बताए ।

उस्तै, बनपाखेका ५७ वर्षीय डेलप्रसाद गुरुङले पनि गाउँमै मुटुको जाँच गराउन पाउँदा सहज भएको प्रतिक्रिया दिए । नौ वर्षअघि काठमाडौँमा मुटुको भल्ब फेरेर पोखराबाट नियमित औषधि सेवन गर्दै आएका गुरुङले अहिले समस्या देखिँदा विशेषज्ञ सेवा लिन टाढा जानु नपरेको बताए ।

उनका अनुसार पोखरा वा काठमाडौँ पुग्दा समय र खर्च दुवै बढ्ने भएकाले यस्तो शिविरले ठूलो सहयोग पुगेको छ ।

सत्य साई सेवा संगठनको आयोजना तथा वडाको सहकार्यमा सम्पन्न एक दिने शिविरमा ११२ पुरुष र ३०० महिला गरी ४१२ जनाले स्वास्थ्य सेवा लिएको वडा सदस्य नेत्र बहादुर गुरुङले जानकारी दिए ।

शिविरमा मुटुरोग, स्त्रीरोग, दन्त, आँखा, हाडजोर्नी तथा नसासम्बन्धी समस्या लगायतका सेवा प्रदान गरिएको थियो । साथै इसीजी र भिडियो एक्स–रे परीक्षण तथा निःशुल्क औषधि वितरण गरिएको आयोजक संगठनले जनाएको छ ।

डा. गौतमको नेतृत्वमा १० जना विशेषज्ञसहित ४१ स्वास्थ्यकर्मीले सेवा दिएको शिविरमा स्याङ्जा र पर्वत जिल्लाका सेवाग्राहीले लाभ लिएका थिए ।