बहुविवाह मुद्दामा अदालतबाट दोषी ठहर भई लामो समयदेखि फरार रहेका दुई जना अन्ततः २९ वर्षपछि पक्राउ परेका छन् ।

पक्राउ पर्नेमा बिरुवा गाउँपालिका–४ का ५२ वर्षीय उमाकान्त पोखरेल (हुमबहादुर थापा) र ४६ वर्षीया शारदा देवी पोखरेल रहेका छन् ।

प्रहरीको विशेष अप्रेसन टोलीले मंगलबार उनीहरूलाई पक्राउ गरेको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक (डीएसपी) प्रसन्न राज चौधरीले जानकारी दिए ।

उनीहरूविरुद्ध २०५३ वैशाख १९ गते बहुविवाह मुद्दा दर्ता भएको थियो । स्याङ्जा जिल्ला अदालतले सो मुद्दामा दोषी ठहर गर्दै दुवै जनालाई दुई/दुई महिना कैद सजाय तोकेको थियो । तर फैसला कार्यान्वयन हुनुअघि नै उनीहरू फरार भएका थिए ।

प्रहरीका अनुसार सजायबाट बच्न दुवैले आफ्नो वास्तविक पहिचान लुकाउँदै लामो समय भारतमा बस्दै आएका थिए । अनुसन्धानका क्रममा उनीहरूको ‘लोकेसन’ पत्ता लगाएर पक्राउ गरिएको डीएसपी चौधरीले बताए ।

पक्राउपछि उनीहरूलाई अदालतमा उपस्थित गराइएको थियो । अदालतले कैद भुक्तानका लागि दुवै जनालाई जिल्ला कारागार स्याङ्जा चलान गरेको प्रहरीले जनाएको छ ।

प्रहरीले पछिल्लो समय अदालतका फैसला कार्यान्वयनलाई प्राथमिकतामा राख्दै फरार अभियुक्त खोजी अभियान तीव्र बनाएको बताएको छ ।