स्याङ्जाको पुतलीबजार नगरपालिकाले किसानलाई अनुदानमा उन्नत जातको धानको बीउ वितरण गरेको छ । धान रोपाइँको समय सुरु भएसँगै नगरपालिकाले ५० प्रतिशत अनुदानमा १६ हजार १४९ किलो धानको बीउ उपलब्ध गराएको हो ।

नगरपालिकाका अनुसार १४ वटै वडाका किसानको मागका आधारमा रामधान १४ हजार ५ किलो र सावित्रीधान २ हजार १४४ किलो बीउ वितरण गरिएको छ । नगरप्रमुख तुलसीराम रेग्मीले विगतका वर्षझैँ यस वर्ष पनि किसानलाई अनुदानमा बीउ उपलब्ध गराइएको जानकारी दिए ।

सबैभन्दा बढी माग पुतलीबजार–१४ बाट आएको थियो । उक्त वडामा मात्रै ६ हजार १५० किलो धानको बीउ वितरण गरिएको नगरपालिकाले जनाएको छ ।

प्रमुख प्रशासकीय अधिकृत धर्मराज ढुङगानाका अनुसार किसानले प्रति किलो ३३ रुपैयाँमा धानको बीउ खरिद गरेका छन् ।

स्याङ्जाका ११ वटै स्थानीय तहमा धानखेती हुने गरेको छ । विशेषगरी आँधीखोला, ज्याग्दीखोला, दरौँखोला र कालीगण्डकी नदी आसपासका फाँटहरू जिल्लाका प्रमुख धान उत्पादन क्षेत्रका रूपमा परिचित छन् । यहाँ रामधान, सावित्री, सावा मन्सुली, हर्दिनाथ लगायत उन्नत तथा स्थानीय जातका धान खेती हुँदै आएको छ ।

कृषि विकास कार्यालयका अनुसार गत आर्थिक वर्षमा जिल्लामा धान उत्पादन १३.८ प्रतिशतले वृद्धि भएर ४१ हजार ६४० मेट्रिकटन पुगेको थियो । हाल जिल्लामा करिब ९ हजार ७२ हेक्टर क्षेत्रफलमा धान खेती हुँदै आएको छ ।

उन्नत बीउ र आधुनिक प्रविधिको प्रयोगले उत्पादन बढ्दै गए पनि खेतीयोग्य धान खेत भने क्रमशः घट्दै गएको कृषि क्षेत्रमा कार्यरत सरोकारवालाहरू बताउँछन् ।