स्याङ्जाको पुतलीबजार नगरपालिकाका सब–इन्जिनियर समित जिरेलमाथि कार्यकक्षमै प्रवेश गरेर कुटपिट गरिएको घटनाले नगरपालिका तरंगित बनेको छ । नगरपालिकाका अनुसार वडा नं. ३ का बाबुराम शर्माले कार्यालयमै पुगेर जिरेलमाथि हातपात तथा अभद्र व्यवहार गरेका हुन् ।

नगरपालिकाका अनुसार प्रदेश र संघीय सरकारमा योजना माग्ने तयारीका क्रममा इस्टिमेट बनाउन आग्रह गर्दै आएका शर्माले सोही विषयलाई लिएर विवाद सिर्जना गरेका थिए । विवाद चर्किएपछि उनले कार्यकक्षमै प्रवेश गरेर जिरेलमाथि कुटपिट गरेको बताइएको छ ।

घटनापछि नगरपालिकाले प्रहरीमा उजुरी दिएको थियो । उजुरीका आधारमा प्रहरीले शर्मालाई पक्राउ गरी अभद्र व्यवहार सम्बन्धी मुद्दामा अनुसन्धान अघि बढाएको जिल्ला प्रहरी कार्यालय स्याङ्जाका प्रहरी निरीक्षक अमृत त्रिपाठीले जानकारी दिए ।

घटनाप्रति गम्भीर ध्यानाकर्षण भएको जनाउँदै पुतलीबजार नगरपालिकाले प्रेस विज्ञप्ति जारी गरेको छ । विज्ञप्तिमा नियमित कार्यालयको काममा खटिएका कर्मचारीमाथि कार्यकक्षमै प्रवेश गरी गरिएको कुटपिट र अभद्र व्यवहार निन्दनीय भएको उल्लेख गरिएको छ ।

नगरपालिकाले कर्मचारीको कार्यविवरणभन्दा बाहिरको विषयलाई लिएर घटना भएको दाबी गर्दै सार्वजनिक सेवा प्रवाह गर्ने सरकारी कार्यालयभित्रै राष्ट्रसेवक कर्मचारीमाथि गरिएको हिंसात्मक तथा अराजक गतिविधि कुनै पनि हालतमा स्वीकार्य नहुने स्पष्ट पारेको छ ।

यस्ता घटनाले कर्मचारीको मनोबल कमजोर बनाउने मात्र नभई कार्यालयको सुरक्षित, मर्यादित र शान्त वातावरणमा समेत प्रत्यक्ष असर पर्ने नगरपालिकाको भनाइ छ । साथै घटनामा संलग्नमाथि कानुनअनुसार कडा कारबाही गर्न समेत माग गरिएको छ ।