बहुविवाह मुद्दामा अदालतबाट कैद सजाय सुनाइएपछि लामो समयदेखि फरार रहेका एक व्यक्तिलाई स्याङ्जा प्रहरीले पक्राउ गरेको छ ।

जिल्ला प्रहरी कार्यालय स्याङ्जाका अनुसार बहुविवाह मुद्दामा एक वर्ष कैद सजाय तोकिएका हरिनास गाउँपालिका–४ का ४१ वर्षीय किमबहादुर थापालाई बुधबार पक्राउ गरिएको हो ।

थापालाई पुतलीबजार नगरपालिका–१० राङखोलाबाट पक्राउ गरेको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेशदत्त अवस्थीले जानकारी दिए ।

उनका अनुसार थापाविरुद्ध स्याङ्जा जिल्ला अदालतले २०७१ चैत २९ गते बहुविवाह मुद्दामा एक वर्ष कैद सजायको फैसला गरेको थियो । त्यसयता उनी फरार रहँदै आएका थिए ।

प्रहरीले पक्राउ परेका थापालाई फैसला कार्यान्वयनका लागि आज नै स्याङ्जा जिल्ला अदालतमा उपस्थित गराएको छ ।

जिल्ला प्रहरी कार्यालयले अदालतबाट सजाय सुनाइएपछि फरार रहेका व्यक्तिहरूलाई खोजी गरी पक्राउ गर्ने अभियानलाई निरन्तरता दिएको जनाएको छ ।