अविरल वर्षाका कारण स्याङ्जाको चापाकोट नगरपालिका–३ कमिरेमा एक परिवारको धनसार भत्किँदा छ वटा बाख्रा मरेका छन् ।

सोमबार दिउँसो परेको लगातारको वर्षाका कारण स्थानीय ४२ वर्षीय प्रेम सारु मगरको टिनले छाएको ढुङ्गा–माटोको कच्ची धनसारसहितको गोठ भत्किएपछि भित्र रहेका छ वटा बाख्रा पुरिएर मरेको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेशदत्त अवस्थीले जानकारी दिए ।

घटनामा मानवीय क्षति भने नभएको जिल्ला प्रहरी कार्यालय स्याङ्जाले जनाएको छ । धनसारभित्र राखिएको सिलाइ मेसिन, फर्निचरका सामान तथा लत्ताकपडासमेत पुरिएको बताइएको छ ।

प्रहरीका अनुसार घटनास्थलमा आवश्यक विवरण संकलन तथा क्षतिको यकिन गर्ने काम भइरहेको छ । अविरल वर्षाका कारण जिल्लाका विभिन्न स्थानमा जोखिम बढ्दै गएको भन्दै नदी तथा पहिरो प्रभावित क्षेत्रमा सतर्कता अपनाउन प्रहरीले सर्वसाधारणलाई आग्रह गरेको छ ।