नेपाल सरकारका पूर्वउपप्रधानमन्त्री तथा पूर्वशिक्षामन्त्री, नेपाली कांग्रेसका वरिष्ठ नेता गोपालमान श्रेष्ठको निधनप्रति शोक व्यक्त गर्दै स्याङ्जाको पुतलीबजार नगरपालिकाले बुधबार सार्वजनिक बिदा दिने निर्णय गरेको छ ।

नगरपालिकाले मंगलबार सूचना जारी गर्दै श्रेष्ठको लोकतान्त्रिक आन्दोलन, शिक्षा क्षेत्र र राष्ट्रप्रतिको योगदानको सम्मानस्वरूप साउन १३ गते नगरपालिकाभित्र सार्वजनिक शोक बिदा दिने जनाएको हो ।

नगरपालिकाका अनुसार बुधबार नगरपालिकाअन्तर्गतका सबै कार्यालय, सामुदायिक तथा संस्थागत विद्यालय र अन्य निकाय बन्द रहनेछन् । यद्यपि अत्यावश्यक सेवा भने नियमित रूपमा सञ्चालन हुने सूचनामा उल्लेख छ ।

श्रेष्ठ पुतलीबजार नगरपालिका–३ का स्थायी बासिन्दा हुन् । उनी लामो समयदेखि नेपाली कांग्रेसको राजनीतिमा सक्रिय रहँदै उपप्रधानमन्त्री, शिक्षामन्त्रीसहित विभिन्न जिम्मेवारीमा रहेर काम गरेका थिए । लोकतान्त्रिक आन्दोलन र संसदीय राजनीतिमा उनको योगदानलाई स्मरण गर्दै नगरपालिकाले सार्वजनिक शोक बिदा दिने निर्णय गरेको पुतलीबजार नगरपालिकाका नगर प्रमुख तुलसीराम रेग्मीले बताए ।

नेपाली कांग्रेसका वरिष्ठ नेता श्रेष्ठको मंगलबार ८३ वर्षको उमेरमा ललितपुरको जावलाखेलस्थित हेलिअस अस्पतालमा उपचारका क्रममा निधन भएको हो । गण्डकी प्रदेशका पूर्वमन्त्री मेखलाल श्रेष्ठले उनको निधनको पुष्टि गरेका छन् ।

उनका अनुसार बुधबार बिहान ८ बजेदेखि ११ बजेसम्म पार्टी कार्यालयमा श्रद्धाञ्जलीका लागि पार्थिव शरीर राखिनेछ । त्यसपछि शवयात्रासहित पशुपति आर्यघाटमा अन्त्येष्टि गरिने कार्यक्रम तय गरिएको छ ।

कांग्रेस सभापति गगन थापाले गत साउन ७ गते मात्र गोपालमान श्रेष्ठलाई पार्टीको वरिष्ठ नेतामा मनोनीत गरिएको घोषणा गरेका थिए । उनको निधनसँगै नेपाली कांग्रेसले लामो राजनीतिक अनुभव भएका एक अग्रज नेतालाई गुमाएको भन्दै विभिन्न तहबाट श्रद्धाञ्जली व्यक्त भइरहेका छन् ।