नेपाली कांग्रेसका सचेतक निश्कल राईले स्याङ्जाको अर्जुनचौपारी गाउँपालिका–१ मा रहेको नेपालकै पहिलो नवग्रह मन्दिर धार्मिक आस्था, पर्यटन र स्थानीय अर्थतन्त्रको महत्वपूर्ण आधार बन्दै गएकाले यसको संरक्षण, पूर्वाधार विकास र प्रवर्द्धनका लागि सरकारले आवश्यक बजेट विनियोजन गर्नुपर्ने बताएका छन् ।

प्रतिनिधिसभाको शून्य समयमा बोल्दै राईले नवग्रह मन्दिरको संरक्षण र विकाससँगै धार्मिक पर्यटन प्रवर्द्धन गर्न सके स्थानीय अर्थतन्त्रलाई थप बलियो बनाउन सकिने बताए ।

‘स्याङ्जा जिल्लाको अर्जुनचौपारी गाउँपालिकामा पहिलो नवग्रह मन्दिर धार्मिक आस्था, पर्यटन र स्थानीय अर्थतन्त्रको महत्वपूर्ण आधार बन्दै गएको छ,’ उनले भने, ‘नेपालको पहिलो नवग्रह मन्दिरको संरक्षण, पूर्वाधार विकास, प्रवर्द्धन तथा धार्मिक पर्यटनमार्फत स्थानीय अर्थतन्त्रलाई थप मजबुत बनाउन आवश्यक बजेट र थप प्रचारप्रसार आवश्यक रहेकोले यसतर्फ सरकारको ध्यानाकर्षण गराउन चाहन्छु ।’

राईले मन्दिरको सम्भावनाअनुसार पूर्वाधार विकास र प्रचारप्रसार हुन नसकेको बताए । मन्दिरलाई व्यवस्थित रूपमा विकास गर्न सके धार्मिक पर्यटकको आगमन बढ्नुका साथै स्थानीय व्यापार, रोजगारी र आयआर्जनमा समेत थप टेवा पुग्ने उनको भनाइ छ ।

मन्दिरको विकासका लागि आवश्यक बजेट छुट्याउन तथा राष्ट्रिय र अन्तर्राष्ट्रियस्तरमा प्रचारप्रसारका कार्यक्रम सञ्चालन गर्न उनले सरकारको ध्यानाकर्षण गराएका हुन् ।

नेपाली कांग्रेसले सांसद नरहेका जिल्लाको समन्वयका लागि राईलाई स्याङ्जाको जिम्मेवारी दिएको छ । सोही जिम्मेवारीअनुसार उनले स्याङ्जाको नवग्रह मन्दिरको विषय संसद्मा उठाएका हुन् ।

अर्जुनचौपारी गाउँपालिका–१ स्थित जलबराह धार्मिक वन परिसरमा रहेको पञ्चकन्या मन्दिर क्षेत्रको नवग्रह मन्दिर छोटो समयमै जिल्लाको प्रमुख धार्मिक तथा पर्यटकीय आकर्षणका रूपमा विकास हुँदै गएको छ ।

मन्दिर निर्माणसँगै आसपासमा धार्मिक पर्यटकको आवागमन बढेको छ । पर्यटकको चहलपहल बढेपछि स्थानीय व्यापार, होटल तथा यातायात व्यवसायमा समेत गतिविधि बढेको छ ।

नवग्रह मन्दिरको व्यवस्थित संरक्षण, पूर्वाधार विस्तार र प्रचारप्रसार गर्न सके धार्मिक पर्यटनका माध्यमबाट स्थानीय अर्थतन्त्रमा थप योगदान पुग्ने सांसद राईको जोड छ ।