स्याङ्जाको वालिङ नगरपालिकाले स्थानीय उत्पादन र परिकारलाई सीधै बजारमा पुर्‍याउने उद्देश्यसहित पहिलोपटक ‘सडक खाना महोत्सव’ गर्न लागेको छ ।

यहि मङ्सिर १७ देखि १९ गतेसम्म आँधीखोला करिडोरको पतञ्जलिदेखि खेलमैदान–सुर्कौदी पुलसम्मका सडक क्षेत्रमा महोत्सव हुने नगरपालिकाका प्रमुख प्रशासकीय अधिकृत गंगालाल सुवेदीले जानकारी दिए ।

महोत्सवले वालिङको स्थानीय परिकार, कला र संस्कृतिलाई एकै ठाउँमा झल्काउने बताउँदै नगरप्रवक्ता तथा वडा नं. १ का अध्यक्ष पदमराज गुरुङले पालिकाले वर्षौंदेखि जगेर्नामा जोड दिँदै आएको बताए । उनका अनुसार महोत्सवमा जातीय भेषभूषा, स्थानीय कलाकारको प्रस्तुति र सांस्कृतिक झल्कोसहित विविध कार्यक्रम रहनेछन् ।

महोत्सवका लागि आवश्यक स्टल बुकिङ मङ्सिर १५ सम्म खुला गरिएको छ । तोकिएको क्षेत्रभित्र प्रतिदिन पाँच सय रुपैयाँ बुझाएर मात्र स्टल राख्न पाइने नगरपालिकाले जनाएको छ ।

तीन दिनसम्म चल्ने महोत्सवले स्थानीय उत्पादनको पहिचान मात्र होइन, बजार विस्तारमा समेत सहयोग पुग्ने नगर उपप्रमुख तथा महोत्सव संयोजक कविता तिवारी गैह्रेले बताइन् ।

नगरका १४ वटै वडामा उत्पादन हुने बस्तुलाई पहिचान गरेर बजारसम्म लैजाने महोत्सवको लक्ष्य रहेको उपप्रमुख तिवारीले जानकारी दिइन् । स्थानीय उत्पादनलाई प्रोत्साहन दिने अभियानलाई पालिकाले पछिल्ला वर्षमा निरन्तर अघि बढाउँदै आएको उनको भनाइ छ ।