स्याङ्जाको बिरुवा गाउँपालिकामा आयोजित नवौँ अध्यक्ष कप अन्तर्गत पुरुष भलिबलतर्फ वडा नं–६ विजेता बनेको छ । स्थानीय खेलकुद विकास समितिको आयोजना तथा बिरुवा गाउँपालिकाको सहआयोजनामा भएको प्रतियोगितामा फाइनल खेलमा वडा नं–४ लाई सिधा सेटमा हराउँदै वडा नं–६ ले उपाधि हात पारेको हो ।

उपाधिसँगै वडा नं–६ ले ८० हजार रुपैयाँसहित ट्रफी, मेडल र प्रमाणपत्र प्राप्त गरेको छ । उपविजेता वडा नं–४ ले ५५ हजार रुपैयाँमा, तेस्रो स्थानमा रहेको वडा नं–७ ले ३० हजार रुपैयाँसहित ट्रफी, मेडल र प्रमाणपत्र प्राप्त गरेका छन् ।

महिला भलिबलतर्फ भने वडा नं–७ पहिलो बनेको छ । वडा नं–४ दोस्रो हुँदा वडा नं–२ तेस्रो स्थानमा रह्यो । उनीहरूले क्रमशः ५० हजार, ३० हजार र २० हजार रुपैयाँसहित ट्रफी, मेडल र प्रमाणपत्र पुरस्कार पाए ।

प्रतियोगिताअन्तर्गत पुरुष भलिबलको भेट्रान्सतर्फ वडा नं–८ विजेता र वडा नं–२ उपविजेता बनेका छन् । उनीहरूले क्रमशः १५ हजार र १० हजार रुपैयाँसहित ट्रफी तथा प्रमाणपत्र प्राप्त गरेका छन् ।

यस्तै, पुरुष व्याडमिन्टनमा वडा नं–२ पहिलो, वडा नं–७ दोस्रो र तेस्रो स्थान वडा नं–४ र वडा नं–७ को अर्को टोलीले हात पार्यो । उनीहरूले क्रमशः १२ हजार, ८ हजार र ४ हजार रुपैयाँसहित ट्रफी तथा प्रमाणपत्र प्राप्त गरेका छन् ।

महिला व्याडमिन्टनमा वडा नं–१ ले पहिलो र वडा नं–८ दोस्रो हुँदा वडा नं–७ र वडा नं–८ को अर्को टोली तेस्रो बने । उनीहरूले क्रमशः ७ हजार, ५ हजार र ३ हजार रुपैयाँसहित ट्रफी तथा प्रमाणपत्र प्राप्त गरेका छन् ।

पुरुष सटफुटतर्फ वडा नं–६ का दुजिक थापा उत्कृष्ट बन्दै प्रथम, वडा नं–४ का सहवीर थापा द्वितीय र वडा नं–६ कै ईश्वर थापा तृतीय बनेका छन् । उनीहरूले क्रमशः ५ हजार, ३ हजार र २ हजार रुपैयाँसहित ट्रफी, मेडल र प्रमाणपत्र पुरस्कार पाए ।

वैशाख ११ गतेदेखि सुरु भएको प्रतियोगिताका विजेता खेलाडी तथा टोलीलाई गण्डकी प्रदेश सभा सदस्य सुधीरकुमार पौडेलले पुरस्कार वितरण गरेका थिए ।

गाउँपालिकाले खेलकुदमार्फत आपसी एकता, स्वास्थ्य र प्रतिभा विकासमा टेवा पुर्‍याउने उद्देश्यले अध्यक्ष कपलाई निरन्तरता दिएको जनाएको छ ।