‘मुन लाइट ग्रुप’ चापाकोट क्रिकेट लिगको उपाधिका लागि आज गण्डकी फायर र साँखर वरियर आमनेसामने हुँदैछन् । खेल शनिबार बिहान ११ बजे चापाकोट नगरपालिका–९ स्थित गंगालाल माध्यमिक विद्यालयको खेलमैदानमा हुने भएको हो ।

चापाकोट नगर क्रिकेट संघका अध्यक्ष प्रेम नारायण रेग्मीका अनुसार फाइनल खेलको सम्पूर्ण तयारी पूरा भएको छ । प्रतियोगितामा सुरुदेखि उत्कृष्ट प्रदर्शन गरेको गण्डकी फायर अपराजित रहँदै फाइनल पुगेको हो । उसले लिग चरणका चारै खेल जितेको थियो ।

यता, साँखर वरियरले सेमिफाइनलमा कुवाकोट युथ स्टारलाई पराजित गर्दै उपाधि यात्रा तय गरेको हो । दुवै टोली उपाधि जित्ने लक्ष्यसहित मैदान उत्रने भएकाले खेल प्रतिस्पर्धात्मक हुने अपेक्षा गरिएको छ ।

चापाकोट नगर क्रिकेट संघको आयोजनामा तथा चापाकोट नगरपालिकाको संरक्षकत्वमा वैशाख २६ गतेदेखि प्रतियोगिता सञ्चालन भइरहेको छ । प्रतियोगितामा ह्वाइट हर्ष, गण्डकी फायर, साँखर वरियर, कुवाकोट युथ स्टार र रोयल आँधीखोला गरी पाँच टोलीको सहभागिता रहेको थियो ।

प्रतियोगिताको विजेताले एक लाख १० हजार रुपैयाँ नगदसहित शिल्ड, मेडल र प्रमाणपत्र प्राप्त गर्नेछ भने उपविजेताले ६० हजार रुपैयाँ नगदसहित ट्रफी, मेडल र प्रमाणपत्र पाउने आयोजकले जनाएको छ । उत्कृष्ट खेलाडी तथा विभिन्न विधामा पनि पुरस्कार प्रदान गरिने बताइएको छ ।