स्याङ्जाको वालिङमा झण्डै २६ वर्षपछि श्याम स्मृति फुटबल प्रतियोगिता पुनः सञ्चालन हुने भएको छ । वालिङ युवा क्लबको आयोजनामा यही जेठ २८ गतेदेखि असार १ गतेसम्म वालिङ नगरपालिका–८ स्थित खेलमैदानमा अन्तर क्लब ११–ए साइड फुटबल प्रतियोगिता सञ्चालन गरिने भएको हो ।

प्रतियोगिताको विजेताले एक लाख रुपैयाँ नगदसहित शिल्ड, मेडल र प्रमाणपत्र प्राप्त गर्नेछ भने उपविजेताले ५० हजार रुपैयाँ नगदसहित शिल्ड, मेडल र प्रमाणपत्र पाउनेछ । प्रतियोगितामा स्याङ्जा, पाल्पा र पर्वतका गरी १० टोलीको सहभागिता रहने जनाइएको छ ।

जिल्लाकै पुरानो फुटबल प्रतियोगितामध्ये एक मानिने श्याम स्मृति फुटबल प्रतियोगितालाई पुनः निरन्तरता दिन लागिएको वालिङ युवा क्लबका अध्यक्ष केशरबहादुर थापा (राजन) ले जानकारी दिए । उनका अनुसार स्वर्गीय श्याम थापाको स्मृतिमा सञ्चालन हुँदै आएको प्रतियोगिताले विगतमा वालिङ तथा आसपासका क्षेत्रका खेलाडी उत्पादनमा महत्वपूर्ण योगदान पुर्‍याएको थियो ।

नयाँ खेलाडीलाई अवसर प्रदान गर्नुका साथै स्थानीय स्तरमा फुटबल गतिविधिलाई थप सक्रिय बनाउने उद्देश्यले प्रतियोगितालाई पुनः सञ्चालन गरिएको अध्यक्ष थापाले बताए । आगामी दिनमा पनि प्रतिभावान खेलाडी उत्पादनमा प्रतियोगिताले सहयोग पुग्ने विश्वास आयोजकको छ ।

संस्थापक समिति संयोजक एलबी ज्वारचनले खेलकुदमार्फत वालिङको पहिचानलाई राष्ट्रिय तथा अन्तर्राष्ट्रिय स्तरसम्म पुर्‍याउन र नयाँ प्रतिभालाई प्रोत्साहन गर्न प्रतियोगिताले भूमिका खेल्ने बताए ।

आयोजकका अनुसार प्रतियोगिता सञ्चालनका लागि करिब ५ लाख ४८ हजार रुपैयाँ आम्दानी हुने र ५ लाख ३० हजार रुपैयाँ खर्च हुने अनुमान गरिएको छ ।

प्रतियोगिताबाट बचत हुने रकम ज्येष्ठ नागरिकलाई लक्षित खुला व्यायामशाला निर्माणमा खर्च गर्ने योजना रहेको आर्थिक व्यवस्थापन उपसमिति संयोजक सुरेश श्रेष्ठले जानकारी दिए ।

फुटबल खेलाडी श्याम थापाको वि.सं. २०५१ असार २३ गते वालिङ खेलमैदानमै फुटबल खेलिरहेका बेला चट्याङ लागेर निधन भएको थियो । त्यसपछि उनको स्मृतिमा परिवार र सहयोगीहरूको पहलमा केही वर्ष प्रतियोगिता सञ्चालन भए पनि विभिन्न कारणले निरन्तरता पाउन सकेको थिएन । अहिले २६ वर्षपछि पुनः उनको स्मृतिलाई जीवित राख्ने उद्देश्यसहित प्रतियोगिता सञ्चालन गर्न लागिएको आयोजकले जनाएको छ ।