विद्यालयलाई केवल पठनपाठनको थलोमा सीमित नराखी उत्पादन र प्रविधिसँग जोड्ने अभ्यास फेदीखोला गाउँपालिकाले थालेको छ । गाउँपालिकाले एकैसाथ विद्यालय परिसरमा कफी खेती विस्तार गरेको छ भने कक्षाकोठामा भर्चुअल शिक्षाको व्यवस्था पनि गरेको छ ।

यसअन्तर्गत फेदीखोला गाउँपालिका–३ भाटखोलास्थित जनप्रिय माध्यमिक विद्यालयको प्राङ्गणमा एक हजार कफीका बिरुवा रोपिएको छ । विद्यार्थीलाई कृषि उद्यमसँग जोड्ने, बाँझो जमिनको सदुपयोग गर्ने र उत्पादनमुखी शिक्षाको अवधारणालाई व्यवहारमा उतार्ने उद्देश्यले कार्यक्रम सञ्चालन गरिएको गाउँपालिकाका अध्यक्ष घनश्याम सुवेदीले जानकारी दिए ।

विद्यालय परिसरको करिब १४ रोपनी क्षेत्रफलमा गाउँपालिकाको कृषि विकास शाखाका प्राविधिकहरूको सहयोगमा कफीका बिरुवा रोपिएको हो । विद्यार्थीले अध्ययनसँगै कृषि अभ्यास गर्न पाउने र त्यसले उद्यमशीलता विकासमा समेत सहयोग पुग्ने अपेक्षा गरिएको छ ।

गाउँपालिका अध्यक्ष सुवेदीका अनुसार स्थानीयस्तरमा कफी खेती विस्तारलाई प्राथमिकतामा राखिएको छ । चालू आर्थिक वर्षभित्र पालिकाभित्रका दुई हजार रोपनी क्षेत्रफलमा २० हजारभन्दा बढी कफीका बिरुवा रोप्ने लक्ष्य रहेको उनले बताए ।

बाँझो जग्गामा कफी खेती गर्ने कृषकलाई प्रतिरोपनी तीन हजार रुपैयाँ प्रोत्साहन रकम दिने नीति लिइएको उनको भनाइ छ । सोही कार्यक्रमअन्तर्गत विद्यालयमा पनि कफी खेतीको नमुना विस्तार गरिएको हो ।

यता, शिक्षामा सूचना प्रविधिको प्रयोग बढाउन गाउँपालिकाले जनप्रिय माध्यमिक विद्यालयमा भर्चुअल शिक्षण, ई–लर्निङ सामग्री तथा आवश्यक उपकरण व्यवस्थापन योजना हस्तान्तरण गरेको छ । करिब १० लाख रुपैयाँको लागतमा तयार गरिएको उक्त योजनाले डिजिटल माध्यमबाट सिकाइलाई थप प्रभावकारी बनाउने अपेक्षा गरिएको छ ।

कृषि र प्रविधिलाई एउटै थलोबाट अघि बढाउने गाउँपालिकाको यो अभ्यासले विद्यालयलाई केवल परीक्षा दिने केन्द्र नभई सीप, उत्पादन र आधुनिक शिक्षाको प्रयोगशालाका रूपमा विकास गर्ने प्रयास देखिएको छ ।