स्याङ्जाको अर्जुनचौपारी गाउँपालिका–१ स्थित देशकै पहिलो नवग्रह मन्दिरमा विशेष क्षमा पूजा तथा दुर्लभ अथर्ववेदीय नवग्रह महासाम्राज्य कल्प सुरु भएको छ । तीन दिनसम्म चल्ने महाअनुष्ठान सोमबार सम्पन्न हुनेछ ।

भोटेकोशी बाढीमा परी प्रभावित नागरिकको शान्तिको कामना, क्षमा पूजा तथा मानव जीवनमा देखिने विभिन्न ग्रहदोष शान्तिका लागि महाअनुष्ठान आयोजना गरिएको हो । ‘ग्रह शान्त भए जीवन शान्त हुन्छ’ भन्ने मूल भावका साथ सुरु गरिएको अनुष्ठानमा सर्वसिद्धिको कामनासमेत गरिने गाउँपालिका अध्यक्ष प्रकाश तिवारीले बताए ।

उनका अनुसार यो सामान्य पूजा वा हवन मात्र नभई कृष्ण यजुर्वेद र अथर्ववेदको ‘नक्षत्र कल्प’मा उल्लेख भएको महासाम्राज्य विधानअनुसार गरिने विशेष अनुष्ठान हो । हजारौँ वर्षअघि महर्षिहरूले गोप्य राखेको दुर्लभ विधिअनुसार कलियुगका लागि निर्धारित शास्त्रोक्त प्रक्रिया पूरा गरिने उनले बताए ।

महाअनुष्ठानअन्तर्गत पाँच लाख ४४ हजारभन्दा बढी मन्त्रको लक्षजप गरिनेछ । वैदिक विद्वान् ब्राह्मणहरूले सूर्यका लागि ७ हजार, चन्द्रका लागि ११ हजार, मंगलका लागि १० हजार, बुधका लागि ९ हजार, गुरुका लागि १९ हजार, शुक्रका लागि १६ हजार, शनिका लागि २३ हजार, राहुका लागि १८ हजार र केतुका लागि १७ हजार मन्त्र जप गर्नेछन् । त्यसपछि जप संख्याको चार गुणा कलि–विधान पूरा गरिनेछ ।

मन्त्रजपपछि नौवटै ग्रहका लागि शास्त्रमा तोकिएका वनस्पति तथा समिधाबाट हवन गरिनेछ । सूर्यका लागि आँक, चन्द्रका लागि पलाश, मंगलका लागि खदिर र शनिका लागि शमी प्रयोग गरिने नवग्रह मन्दिर व्यवस्थापन समितिका अध्यक्ष भरतराज पोखरेलले बताए ।

हवनकुण्डमा नौ प्रकारका अन्न, शुद्ध घिउ, तिल, जौ, मह तथा विशेष जडीबुटीयुक्त नवधान्य र अन्य द्रव्यको आहुति दिइनेछ ।

नवग्रहसँगै तिनका शासक अधिदेवता र प्रत्यधिदेवताका लागि पनि विशेष तर्पण तथा आहुति दिइने आयोजकले जनाएको छ । सूर्यका लागि शिव, चन्द्रका लागि पार्वती र बुधका लागि विष्णुलगायत देवताका नाममा छुट्टै विधि पूरा गरिनेछ ।

मध्यरातमा अघोर पूजा
महाअनुष्ठानको अर्को विशेष पक्ष २८ भदौको मध्यराति १२ बजे गरिने अघोर पूजा हो । तान्त्रिक विधिअनुसार कुभिन्डो, नरिवल, कागती, उखु र जायफलको सात्विक बलि दिने कार्यक्रम छ ।

मन्त्रको अखण्ड गुञ्जनबीच मध्यरातमा गरिने उक्त विधिलाई अनुष्ठानको महत्वपूर्ण पक्षका रूपमा लिइएको छ । आयोजकका अनुसार यस विधिमार्फत यजमान तथा दर्शनार्थीमाथि रहेको भनिएका ग्रहदोष, अदृश्य बाधा र संकट निवारणको कामना गरिनेछ ।

तीन दिनसम्म सञ्चालन हुने महाअनुष्ठानमा करिब ५० हजार भक्तजनले मन्दिरमा पूजा तथा आराधना गर्ने अनुमान गरिएको छ ।

हरेक वर्ष गणेश चतुर्थीको अवसरमा विशेष पूजा हुँदै आएको नवग्रह धाममा मन्दिर निर्माणपछि पहिलोपटक यस प्रकारको महाअनुष्ठान आयोजना गरिएको हो । नवभूज आकारमा आकाशतर्फ फर्काइएको २७ फिट अग्लो नवग्रह मन्दिरमा सौर्यमण्डल तथा ब्रह्माण्डको प्रतिमासमेत राखिएको छ । महाअनुष्ठानमा सहभागी हुने भक्तजनले उक्त प्रतिमाको प्रत्यक्ष दर्शनसमेत गर्न सक्नेछन् ।