स्याङ्जाको अर्जुनचौपारी गाउँपालिका–१ मा रहेको देशकै पहिलो नवग्रह मन्दिरमा तीनदिने विशेष महाअनुष्ठान सम्पन्न भएको छ । अनुष्ठानमा नौवटै ग्रहका लागि ५ लाख ४४ हजारभन्दा बढी मन्त्रको लक्षजपसँगै हवन गरिएको छ ।

नवग्रहमा क्षमा पूजासहित इतिहासमै दुर्लभ मानिएको अथर्ववेदीय नवग्रह महासाम्राज्य कल्पअनुसार महाअनुष्ठान गरिएको हो । हवनकुण्डमा नौ प्रकारका अन्न, शुद्ध घिउ, तिल, जौ, मह तथा विशेष जडीबुटीयुक्त नवधान्य र द्रव्यको आहुति दिइएको थियो ।

नवग्रहका साथै तिनका शासक अधिदेवता र प्रत्यधिदेवताका लागि समेत विशेष तर्पण गरिएको थियो । जसमा सूर्यका लागि शिव, चन्द्रका लागि पार्वती र बुधका लागि विष्णुको विशेष तर्पण गरिएको आयोजकले जनाएको छ ।

भोटेकोशी बाढीमा परेका नागरिकका लागि क्षमा पूजा तथा मानव जीवनमा देखिने सम्पूर्ण ग्रहदोष शान्ति र सर्वसिद्धि प्राप्तिको कामनासहित महाअनुष्ठान गरिएको गाउँपालिका अध्यक्ष प्रकाश तिवारीले बताए ।

उनका अनुसार यो सामान्य पूजा वा हवन मात्र नभई कृष्ण यजुर्वेद र अथर्ववेदको ‘नक्षत्र कल्प’मा उल्लेखित दुर्लभ महासाम्राज्य विधानअनुसार गरिएको अनुष्ठान हो । हजारौँ वर्षअघि महर्षिहरूले गोप्य राखेको उक्त विधिअनुसार अनुष्ठान गरिएको उनको भनाइ छ ।

महाअनुष्ठानका क्रममा अघोर पूजा तथा तान्त्रिक विधिअनुसार कुभिन्डो, नरिवल, कागती, उखु र जायफलको सात्त्विक बलिसमेत दिइएको थियो ।

तीन दिनसम्म चलेको अनुष्ठानमा करिब २५ हजार भक्तजनले मन्दिरमा पुगेर पूजा तथा आराधना गरेको मन्दिर व्यवस्थापन समितिका अध्यक्ष भरतराज पोखरेलले बताए ।

अनुष्ठानमा कलाकार शिव शर्मा र घनश्याम रिजालले भक्तजनलाई धार्मिक तथा सांस्कृतिक प्रस्तुतिमार्फत मनोरञ्जन गराएका थिए ।