बंगालको खाडीमा विकसित अर्नब चक्रवातको प्रभाव नेपालमा पर्ने सम्भावना देखिएपछि जिल्ला प्रशासन कार्यालय स्याङ्जाले उच्च सतर्कता अपनाउन आग्रह गरेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरण, सिंहदरबार काठमाडौंले कात्तिक ९ गते जारी गरेको सूचनाअनुसार चक्रवातको प्रभाव आज रातिदेखि नेपालमा देखिन सक्नेछ । कात्तिक १३ र १४ गते गण्डकी प्रदेशसहित विभिन्न स्थानमा यसको प्रभाव बढी पर्ने अनुमान गरिएको छ ।

उक्त अवधिमा चट्याङ, हावाहुरीसहित मध्यम वर्षा हुने र एक–दुई स्थानमा भारी वर्षासमेत हुन सक्ने चेतावनी दिइएको छ । सम्भावित जोखिमको सूचीमा स्याङ्जा जिल्ला पनि रहेकाले जोखिम न्यूनीकरणका लागि पूर्वतयारी गर्न र उच्च सतर्कता अपनाउन प्रशासनले सम्बन्धित सबैमा अनुरोध गरेको हो ।

जिल्ला प्रशासन कार्यालय स्याङ्जाका सूचना अधिकारी तथा सहायक प्रमुख जिल्ला अधिकारी शेषकान्त पौडेलले सम्भावित जोखिमलाई ध्यानमा राख्दै धानबाली काट्ने र भित्र्याउनेलगायतका कृषि कार्य समयमै सम्पन्न गर्न आग्रह गरेका छन् ।

मौसम प्रतिकूल हुँदा सडक तथा हवाई यातायातसहित दैनिक जनजीवन प्रभावित हुन सक्ने भएकाले अत्यावश्यक कामबाहेक यात्रा नगर्न र नगराउन पनि प्रशासनले आग्रह गरेको छ । जोखिमयुक्त स्थानमा बसोबास गर्ने व्यक्ति तथा परिवारलाई सुरक्षित स्थानमा सार्नसमेत भनिएको छ ।

सम्भावित विपद् सामना गर्न सुरक्षा निकाय, स्थानीय तह, अत्यावश्यक सेवा प्रवाह गर्ने निकाय, रेडक्रस, स्वयंसेवक तथा अन्य सरोकारवाला संस्थालाई परिचालनको तयारी अवस्थामा रहन अनुरोध गरिएको छ ।

आम नागरिकलाई जोखिमबारे समयमै जानकारी गराउन तथा उपलब्ध जनशक्ति, दमकल, एम्बुलेन्स र डोजरलगायतका साधन तत्काल परिचालन गर्न सक्ने गरी तयारी अवस्थामा राख्न प्रशासनले आग्रह गरेको छ ।

यस अवधिमा नेपाल मौसम विज्ञान विभागलगायत आधिकारिक निकायबाट जारी हुने अद्यावधिक मौसम पूर्वानुमान, पूर्वसूचना र चेतावनीको पालना गर्न पनि प्रशासनले सबैमा अनुरोध गरेको छ ।

मौसमसम्बन्धी जानकारी लिन ११५५ मा सम्पर्क गर्न सकिनेछ । विपद्का बेला सहयोग आवश्यक परे १२३४, १०० वा १११४ मा सम्पर्क गर्न प्रशासनले आग्रह गरेको छ ।