गण्डक न्युज पोखरा, २ फागुन / भारतीय प्याराग्लाईडरले बुधबार ज्यान गुमाएका छन् । प्याराग्लाइडिङकै क्रममा सन्तुलन गुमाएर फेवातालमा खस्दा डुबेर शिवराजुमणिको ज्यान गएको हो ।

भारत कर्नाटक राज्य घर भई यहाँ प्याराग्लाइडिङ गर्दै आएका शिवराजुमणि प्याराग्लाइडिङ ल्याण्ड गर्ने क्रममा फेवा तालमा खसेको जिल्ला प्रहरी कार्यालय कास्कीले जनाएको छ । ५४ वर्षीया उनी सिधै तालमा खसेको प्रत्यक्षदर्शी शिव जलारीको भनाई उद्दृत गर्दै प्रहरीले जानकारी दिएको छ ।

उनलाई तत्काल उद्धार गरी उपचारका लागि मेट्रोसिटि अस्पताल लगेपनि चिकित्सकले मृत घोषणा गरेका थिए । प्याराग्लाईडिङ उडानका लागि विश्वकै उत्कृष्ट गन्तब्य उन्मुख पोखरामा समय समयमा यस्तो घटना भईरहेका छन् ।

यसअघि, गत असारमा पोखरा लेखनाथ ३३ घर भएका प्रभात सुवेदीको ज्यान गएको थियो । त्यसअघि, अघिल्लो वर्ष माघको दोस्रो साता बेलायती नागरिक मिचेल पिटर र २०७३ मै कार्तिक दोस्रो साता स्याङ्जा स्वरेकमा लेकसाईडका शैलेष पहारीको निधन भएको थियो ।

गत वर्ष पुसमा स्याङ्जा कालिकाकोटमा सुडानी नागरिक टन सोडन ग्रीन भीरमा अड्किँदा गम्भिर घाईते हुन पुगेका थिए । गत असोजमा फेवातालमा खसेका पाँचजना यात्रु र छ जना प्याराग्लाईडिङ पाइलटलाई उद्धार गरिएको थियो ।