पोखरा । बागलुङ नगरपालिका–३ हाडेपाखामा बिहीबार साँझ भएको न्यु एभरेष्ट एकेडेमीको भ्यान दुर्घटनामा परी मृत्यु हुने विद्यार्थीको संख्या २ पुगेको छ ।

स्कुल भ्यान दुर्घटना हुँदा गम्भीर घाइते भएका १३ वर्षका सुजल छन्त्यालको पोखरास्थित गण्डकी अस्पतालमा उपचारका क्रममा आज बिहान मृत्यु भएको जिल्ला प्रहरी कार्यालय बागलुङले जनाएको छ ।

यस्तै बागलुङ नगरपालिका–३ बस्ने १५ वर्षका अमन बोहोराको उपचारको क्रममा बिहीबार धौलागिरि अस्पतालमा मृत्यु भएको थियो ।

स्कुल भ्यान दुर्घटनामा घाइते भएका बागलुङ नगरपालिका–३ का १४ वर्षका संगम किसानको गण्डकी अस्पताल पोखरामा उपचार भइरहेको छ । शरीरका विभिन्न भागमा चोट लागेका उनको अवस्था गम्भीर रहेको प्रहरीले जनाएको छ ।

यस्तै, पोखराकै मणिपाल शिक्षण अस्पतालमा ८ जना घाइते विद्यार्थीको उपचार भइरहेको छ । मणिपालमा उपचाररत ८ वर्षीय सोलुमन किसान, ५ वर्षीय आयन बोहोराको अवस्था गम्भीर रहेको छ ।

मणिपाल अस्पतालमै उपचाररत अन्य घाइते विद्यार्थीहरूमध्ये १२ वर्षका आयुष बोहरा र ९ वर्षका सुमित गैरेको अवस्था सामान्य छ । १० वर्षीय अनमिया किसान र ९ वर्षीय उमंग किसानको अवस्था मध्यम रहेको छ ।

यस्तै १३ वर्षकी समीक्षा गैरेको टाउकोमा चोट लागे पनि अवस्था सामान्य रहेको छ । उनीहरूलाई धौलागिरि अस्पतालबाट थप उपचारका लागि पोखरा रिफर गरिएको थियो ।

धौलागिरि प्रादेशिक अस्पताल बागलुङमा विद्यालयकी कर्मचारी २५ वर्षकी सारीका बोहोरा र विद्यार्थी १२ वर्षीय अलिस्ना किसानको उपचार भइरहेको छ । उनीहरूको स्वास्थ्य अवस्था मध्यम छ ।

बागलुङ नगरपालिका–१ रामरेखामा रहेको सो विद्यालयको भ्यान दुर्घटना हुँदा चालक र शिक्षिकासहित २५ जना घाइते भएका छन् । दुर्घटनाको छानबिनका लागि जिल्लास्तरीय समिति गठन गरिसकिएको छ ।

धौलागिरि अस्पतालमा उपचारपछि डिस्चार्ज भएका चालक वीर मगरलाई प्रहरीले नियन्त्रणमा लिएको छ ।