काठमाडौं–  कृषि विकास बैंकबाट भएको पाँच करोड ह्याकिङमा कैलाश विकास बैंकको संलग्नता देखिएको प्रहरीले दाबी गरेको छ । कृषि विकास बैंकबाट ४ करोड ७३ लाख रुपैयाँ ह्याक गरेर निकालिएको र उक्त रकम विभिन्न स्थानमा पठाइएको पाइएको प्रहरीले जनाएको छ । त्यसमध्ये १५ लाख रुपैयाँ कैलाश विकास बैंकमा गएको प्रहरी अनुसन्धानले देखाएको छ ।

बुधवार राजधानीमा आयोजित पत्रकार सम्मेलनमा महानगरिय अपराध महाशाखाका प्रमुख, वरिष्ठ प्रहरी उपरीक्षक(एसएसपी)सहकुल थापाले भने,‘कृषि विकास बैंकबाट निकालिएको करिब ५ करोड मध्ये १५ लाख रुपैयाँ कैलाश विकास बैंकको मास्टर खातामा ट्रान्सफर भएको देखिएको छ ।’

कृषि विकास बैंकको ह्याक भएको पैसा कसरी कैलाश विकास बैंकमा पुग्यो भन्ने विषयमा थप अनुसन्धान गर्ने र त्यसका लागि नेपाल राष्ट्र बैंकलाई पनि आग्रह गरिने एसएसपी थापाले बताए ।

कृषि विकास बैंकबाट भएको रकम ह्याकिङ प्रकरणमा प्रहरीले १२ जनालाई पक्राउ गरेको छ । जसमध्ये एक जना हुण्डी कारोबारीसमेत रहेका छन् । उनीहरुलाई प्रहरीले बुधबार पत्रकार सम्मेलन मार्फत सार्वजनिक गरेको छ ।

कृषि विकास बैंक ह्याकिङमा भारतमा बस्ने व्यक्तिको संलग्नता देखिएको प्रहरीले जनाएको छ । भारतमा बस्ने ह्याकरले नेपालमा ११ जना एजेन्ट राखेको र ह्याकिङको पैसा उनीहरुको खातामा पठाउने गरेको पाइएको प्रहरी अनुसन्धानमा फेला परेको छ ।

ह्याकरले ५०/५० लाखका दरले उनीहरुको खातामा रकम पठाउने र नेपालमा रहेका व्यक्तिले त्यसको १० प्रतिशत आफूले राखेर बाँकी रकम हुण्डी मार्फत भारत पठाउने गरेको पाइएको प्रहरीले जनाएको छ ।