पोखरा । पूर्वराजा ज्ञानेन्द्र शाह र पूर्वरानी कोमल शाह चैत २ देखि झापामै छन् । लकडाउनका कारण त्यहाँ अड्किएका पूर्व राजदम्पतीलाई जिल्ला प्रशासन कार्यालयले आज काठमाडौं जाने पास दिएर आजै रद्ध गरेको छ । गृह मन्त्रालयले निर्देशनपछि प्रमुख जिल्ला अधिकारी उदयबहादुर रानामगरले पास रद्द गरिदिएका हुन् ।

पूर्व राजदम्पत्ति निजी भ्रमणमा झापा पुगेका थिए । लकडाउन सुरु भएपछि उनीहरु त्यहीँ रोकिएका थिए । पूर्वराजाका सहयोगीले इमेलमार्फत अनुमतिपत्रका लागि निवेदन दिएपछि प्रशासनले तत्काल उपलब्ध गराएको थियो । तर, फेरि गृहमन्त्रालले प्रक्रिया नपुगेको भनेपछि त्यसलाई रद्द गरिएको प्रजिअ रानामगरले बताएको अनलाइनखबरले न्यूज प्रकाशित गरेको छ ।
गृहले सहमति दिनासाथ तुरुन्तै ई–पास उपलब्ध गराउने रानामगरको भनाई छ । पास उपलब्ध भएमा पूर्वराजा रानीले शुक्रबार काठमाडौं फर्किन चाहेका छन् । झापामा पूर्वराजपरिवारको चियावगान छ । अहिले उनीहरु त्यहीँ रहेको घरभित्र बसिरहेका छन् ।

पूर्व राजारानी लकडाउनको पूर्ण पालना गरेर बसिरहेको संवाद सचिव फणिराज पाठकले बताएका छन् । पूर्व युवराज्ञी हिमानी भने आफ्ना छोराछोरीहरुसहित बैंककमा छिन् । पूर्व युवराज पारस पोखरामा छन् । कहिले डिस्कोमा नाचिरहेको घण्टैपिच्छे लाइभ गर्छन्, कहिले राहत कार्यक्रममा देखिन्छन् ।