रुकुम पश्चिमको स्यार्पु तालमा बच्चालाई उद्दार गर्ने क्रममा दुई युवकको ज्यान गएको छ । रुकुम पश्चिमको बाँफीकोट गाउँपालिकामा पर्ने स्यार्पु तालको मुहानमा बच्चा बग्न थालेको देखेपछि उद्दार गर्न गएका उनीहरु आफै बगेर बेपत्ता भएका थिए ।

बाँफीकोट गाउँपालिका वडा नं। ५ वडागाउँ निवासी बर्ष २१ का अनिल घर्ती मगर र २३ बर्षिय अर्जुन घर्ती मगरको ज्यान गएको हो । अर्जुनको शव पहिले भेटिएको थियो भने तयसपछि अनिललाई भेटिएको थियो ।

प्रत्यक्षदर्शीले बताए अनुसार तालको मुहानतर्फको खोलामा बच्चा बगेको देखेपछि सुरुमा अनिल घर्ती मगर बच्चालाई बचाउन गएका थिए । बच्चालाई उद्धार गर्न गएका अनिलले गाह्रो भयो भन्दै गुहार मागेपछि उनलाई निकाल्न अर्जुन घर्ती मगर हाम्फाले । त्यसपछि दुवै जना निस्कन सकेनन् । उनीहरु दुबैजना एकैगाउँका छिमेकी हुन् । बच्चाको भने अरु स्थानीयले जिवितै उद्धार गरेका छन् ।

स्यार्पुतालमा माछा मार्न गएका उनीहरु बुधबार दिउँसो बच्चालाई बचाउन खोज्दा आफै बेपत्ता भएको प्रहरीले बताएको छ । वेपत्ता भएका दुबै जना पौडीमा पोख्त भएको बताइएको छ । बर्षाका कारण बढेको तालमा आउने खोलाको भेलले तालको दलदलमा दबाउँदा उनीहरु आफू जोगिन नसकेको हुनसक्ने स्थानीयले अनुमान गरेका छन् ।