पोखरा – जिल्ला प्रहरी कार्यालय कास्कीले एकै दिन २८ जना फरार प्रतिवादीलाई पक्राउ गरेको छ।

दण्डहिनता बिरुद्दको अभियान अन्तर्गत जिल्ला अदालत कास्की तथा जिल्ला प्रशासन कार्यालयले बिभिन्न मुद्धाको फैसलामा कैद र जरिवाना तोकेर हालसम्म फरार रहँदै आएका २८ प्रतिवादीलाई एकैदिन पक्राउ गरेको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

हमालका अनुसार पक्राउ पर्नेमा सरकारी दस्तखत किर्ते गर्ने, बैंकिंङ कसुर गर्ने देखी लिएर सार्वजनिक अपराध मुद्धाका फरार प्रतिवादी समेत छन् ।

प्रतिवादी मध्ये स्याङ्गजा जिल्ला कोल्मा स्थायी घर भइ हाल पोखरा २७ बस्दै आएका सरकारी दस्तखत किर्ते मुद्धामा १ बर्ष कैद र ५० रुपैयाँ जरिवाना तोकिएका २१ वर्षीय अनिल थापा मगर र पोखरा १० घर भइ बैंकिंङ कसुर मुद्धामा ७ दिन कैद सहित ९ लाख ४० हजार रुपैयाँ जरिवाना तोकिएकोमा हालसम्म फरार वर्ष ५३ का धीरज गुरुङ छन् । यी, वाहेक केही सार्वजनिक अपराध मुद्धामा ३५० देखी ५,००० रुपैयाँसम्म जरिवाना पाएर फरार रहेका कास्की जिल्ला अन्तर्गतका विभिन्न स्थानमा लुकिछिपी बस्दै आएका २६ जना प्रतिवादी रहेको प्रवक्ता हमालले जानकारी दिए ।

पक्राउ परेका उनीहरु सबैलाई हाल जिल्ला अदालत कास्कीमा पेश गरिएको छ ।