काठमाण्डौ –  नेपाल विद्युत् प्राधिकरणका कार्यकारी निर्देशक कुलमान घिसिङको कार्यकाल आइतबारदेखि पूरा भएको छ ।

पुनः नियुक्तिका विषयमा हालसम्म कुनै निर्णय नभएका कारण उनको कार्यकाल आइतबार पूरा भएको हो । यद्यपी सोमबार बस्ने मन्त्रिपरिषद्को नियमित बैठकबाट यसबारे ठोस निर्णय निस्कने बताइएको छ ।

तत्कालीन उर्जामन्त्री जनार्दन शर्माको सिफारिसमा प्राधिकरणको कार्यकारी निर्देशकमा घिसिङ नियुक्त हुँदासम्म मुलुकमा दैनिक १८ घण्टासम्म लोडसेडिङ भैरहेको थियो । तर जिम्मेवारी सम्हालेकै वर्षको तिहारबाट घिसिङले काठमाडौं उपत्यकाबाट अनौपचारिक रुपमा लोडसेडिङ मुक्त अभियान शुरु गरेका थिए । चार वर्षे कार्यकाल सकिदासम्म घिसिङ उक्त अभियानमा सफल भएका छन् । अहिले देश नै लोडसेडिङमुक्त भैसकेको छ ।

घिसिङको कार्यशैलीबाट प्रभावित सर्वसाधारणले पुनः कार्यकारी निर्देशकमा घिसिङकै निरन्तरता चाहेका छन् । तर कार्यकाल सकिने अन्तिम दिनसम्म पनि सरकारले यसबारेमा कुनै निर्णय गरेको छैन ।