पोखरास्थित मणिपाल शिक्षण अस्पतालमा अध्ययनरत विद्यार्थीहरुद्धारा सञ्चालित डाक्टर्स गाउँले संस्था सक्रिय ढंगले अघि बढेको छ । ‘स्वास्थ्य सम्बन्धी जानकारी सबैका लागि’ भन्ने मूल उद्देश्यका साथ सञ्चालन भएको संस्थाले विभिन्न रचनात्मक कार्य गरेको छ ।

मणिपाल शिक्षण अस्पतालमा अध्ययनरत २०१६ को व्याचमा अध्ययनरत विद्यार्थीद्धारा २०७५ सालमा संस्था स्थापना भएको हो । संस्थामा हाल २५ जना सदस्य रहेको प्रचार प्रसार संयोजक राहुल गोइतले जानकारी दिए । रोग लागेर उपचार गर्नुभन्दा रोग लाग्न नदिनु नै राम्रो भएको भन्दै गोइतले आफूहरुको सेवा गाउँ-गाउँका नागरिकका लागि हुने स्पष्ट पारे ।

प्रचार संयोजक गोइतले भने, ‘संस्थामार्फत हृदयाघात, मधुमेह, कोरोना, डेंगु, दाँत रोगलगायतका विभिन्न रोगको सचेतना कार्यक्रम गरिसकेका छौं । आगामी दिनमा यस्ता कार्यक्रमलाई निरन्तरता दिनुका साथै थप सेवा विस्तार गर्दै अघि बढ्छौं ।’ रोट्र्याक्ट क्लबसंग मिलेर स्तनपानको महत्वबारे पनि सचेतना कार्यक्रम गरिसकेको उनले बताए । आफूहरुको संस्था डक्टर गाउँले र यसबाट सञ्चालन भएका कार्यक्रमबाट धेरै लाभान्वित भएको र धेरै ठाउँबाट प्रशंसा पाएको गोइतले बताए ।

स्वास्थ्य जानकारीबाट बञ्चित भएका जनतालाई स्वास्थ्यबारे जनचेतना जगाउन देशका कुनाकुनामा पुग्ने संस्थाका सदस्य विनोद अधिकारीले जानकारी दिए । डक्टर गाउँलेले अफिसियल युटुव च्यानलमार्फत विभिन्न १६ वटा स्वास्थ्यसमबन्धी जानकारी समेत गराएको र आगामी दिनमा थप सक्रियतापूर्वक अघि बढ्ने उनले बताए ।

उनले सञ्चारको क्षेत्र निकै फराकिलो भएको तर यस्तो विकास स्वास्थ्य क्षेत्रमा नभएको भन्दै उनले सञ्चारकै माध्यमबाट कुनाकुनामा रहेका नागरिकलाई स्वास्थ्य सम्बन्धी जानकारी दिंदै जाने जानकारी दिए ।