नेकपा एमालेका वरिष्ठ नेता माधवकुमार नेपालले अहिले पार्टी अत्यन्तै कठिन अवस्थाबाट गुज्रिरहेको बताएका छन् ।

एमालेको माधवकुमार नेपाल र झलनाथ खनाल पक्षको ललितपुरको सानेपास्थित हेरिटेज पार्टी प्यालेसमा आज र भोलि हुने राष्ट्रिय कार्यकर्ता भेलालाई सम्बोधन गर्दै नेता नेपालले अहिले अवस्था कसरी आयो भन्ने विषयमा कार्यकर्ता जानकार रहेको बताए ।

नेता नेपाल कम्युनिष्ट आन्दोलनलाई नयाँ उचाईमा पुर्याउनका लागि राष्ट्रिय कार्यकर्ता भेला आयोजना गरिएको बताए । अहिले पार्टीभित्र यस्तो अवस्था आउनुमा एक मात्र जिम्मेवार अध्यक्ष केपी शर्मा ओली रहेको बताए ।

कम्युनिष्टमा विचार दर्शन र सिद्धान्त भएन भने पार्टी बनाउन नसकिने र अहिले ओलीमा यही भइरहेको उनको आरोप छ । ‘यो स्थिति उत्पन्‍न हुनुमा अरु कोही होइन पार्टी अध्यक्ष केपी शर्मा ओली जी, सबै बितण्डाको निम्ति उहाँ नै जिम्मेवार हुनुपर्छ । तथ्य र प्रमाण चाहिन्छ भने एक भारी छन्’ उनले भने । उनले साइबर स्यालहरु ज्युँदै रहेछन् भन्दै टिप्पणी पनि गरे । ‘यो साइबर स्यालहरु अहिले पनि ज्यूँदै रहेछन् । अहिले पनि बाङ्चिगरहेकै रहेछन्,’ उनले भने, ‘अब एमाले पुनर्जीवन पाइसकेपछि पनि ज्यूँदै रहेछ । साइबर स्यालदेखि होसियार ।’