त्रिदेशीय फुटबलअन्तर्गत नेपाली राष्ट्रिय फुटबल टोलीले बंगलादेशसँग गोलरहित बराबरी खेलेको छ । आज त्रिपुरेश्वरस्थित दशरथ रंगशालमा भएको खेलमा नेपालले गोलरहित बराबरी खेलेको हो ।

पहिलो खेलमा कीर्गिस्तानसँग बराबरी खेलेको नेपालले दोस्रो खेलमा पनि बराबरी खेलेको हो । अब फाइलनमा नेपालले बंगलादेशसँग नै खेल्नेछ । फाइनल खेल दशरथ रंगशालमा आउँदो सोमबार हुनेछ ।

आजको खेलको २१औँ मिनेटमा नेपालका अन्जन विष्टले गोल गर्ने अवसर चुकाए । उनले डीबक्सभित्रको बल हेड गरे पनि पोलको माथिबाट गएको थियो । २४औँ मिनेटमा अविशेक रिजालले दिएको पासलाई त्रिदेव गुरुङले डीबक्सभित्रबाट हाने पनि गोल भने हुन सकेन ।

खेलको ५९औँ मिनेटमा अन्जन विष्टले सिक्स यार्डबाट प्रहार गरेको बल बंगलादेशका गोलरक्षकले सहजै बचाएका थिए । ६४औँ मिनेटमा रन्जित धिमालले कर्नरबाट दिएको बल अविशेक रिजालले हेड गरे पनि गोलमा परिणत हुन सकेन ।

बंगलादेशले उद्घाटन खेलमा कीर्गिस्तानलाई १-० ले पराजित गरेको थियो ।