प्रधानमन्त्री केपी शर्मा ओलीविरूद्ध प्रमुख प्रतिपक्षी दल नेपाली कांग्रेस र माओवादी केन्द्रले अविश्वासको प्रस्ताव लैजाने अन्तिम तयारी गरेका छन्। उनीहरूले संसदको चौंथो ठूलो दल जनता समाजवादी पार्टीको निर्णय कुरिरहेका छन्।

जसपाका शीर्ष नेताहरू आन्तरिक छलफलमै व्यस्त छन् । उनीहरूबीच निरन्तर छलफल भएको छ तर कुनै निर्णय गर्न सकेका छैनन् । जसपा नेताहरू महन्थ ठाकुर र राजेन्द्र महतो प्रधानमन्त्री ओलीसँग मिलेर सत्ता गठबन्धन बनाउने प्रयत्नमा छन् तर बाबुराम भट्टराई र उपेन्द्र यादवलगायतका नेताहरू कुनै पनि हालतमा ओलीसँग मिल्न नहुने अडानमा छन् ।

सकेसम्म नेताहरुले सहमतिमै निर्णय नगर्ने गर्ने नभए भोलिसम्ममा बहुमतका आधारमा भए पनि निर्णय हुने जसपाका एक नेताको भनार्य छ । जसपाले निर्णय गरे बुधबार नै प्रधानमन्त्री ओलीविरूद्ध अविश्वासको प्रस्ताव संसदमा दर्ता गर्ने तयारी रहेको कांग्रेसका एक नेता बताउँछन् । बहुमतीय निर्णय भए सरकारको विपक्षमा अर्थात् बाबुराम र उपेन्द्रको लाइनमा बढी कार्यकारी समिति सदस्य छन् ।

पछिल्लो साता कांग्रेस र माओवादी केन्द्रले थप छलफल गरेर अविश्वासको प्रस्ताव लैजाने निष्कर्ष निकालेका हुन्। माओवादी केन्द्रका एक नेताका अनुसार दुबै पार्टीले अविश्वासको प्रस्ताव अघि बढाउन आफ्ना सांसदहरूको हस्ताक्षरसमेत संकलन गरिसकेका छन्।