राष्ट्रपति विद्यादेवी भण्डारीले बहुमतको सरकार गठन गर्न दलहरुलाई आहृवान गरेकी छन् ।  सोमबार प्रतिनिधि सभाबाट प्रधानमन्त्री केपी ओली विश्वासको मत पाउन नसकेर पदमुक्त भएलगत्तै राष्ट्रपतिले संविधानको धारा ७६ (२) अनुसार संसदमा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने संसद सदस्यलाई तीन दिनभित्र दाबी पेश गर्न आहृवान गरेकी हुन् ।

यसअघि, सोमबार अपराह्न संसदमा भएको मतदानमा विश्वासको मत लिने प्रधानमन्त्रीको प्रस्ताव बहुमतले अस्वीकृत भएको थियो । प्रतिनिधि सभाको विश्वास नपाएसँगै प्रधानमन्त्री ओली स्वतः पदमुक्त भएका छन् ।

ओली पदमुक्त भएलगत्तै नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल र जनता समाजवादी पार्टीका अध्यक्ष उपेन्द्र यादवले संविधानको धारा ७६(२) अनुसार प्रधानमन्त्री नियुक्त गर्ने प्रक्रिया शुरु गर्न राष्ट्रपतिलाई आग्रह गरेका थिए ।

नयाँ सरकार गठनको पक्षमा उभिएका तीन दलसँग कांग्रेस ६१, माओवादी केन्द्र ४९ तथा जसपाको डा. बाबुराम भट्टराई–उपेन्द्र यादव पक्षका १६ सांसद देखिएका छन् ।

प्रतिनिधिसभामा कायम रहेको २७१ सदस्यमा बहुमतका लागि १३६ जना सांसदको समर्थन चाहिन्छ । जसपाको पूर्व राजपा खेमाले समर्थन नगरे यो समूहलाई बहुमत पुग्दैन ।

सरकार बनाउन चाहने पक्षले यही वैशाख ३० गते विहीबार साँझ ९ बजेसम्ममा सरकार बनाउने दावी पेश गर्नुपर्नेछ ।