राष्ट्रपति विद्यादेवी भण्डारीले प्रतिनिधि सभा विघटन गरी मध्यावधि निर्वाचन घोषणालाई विपक्षी दलका नेताहरूले संविधान च्यात्ने काम र प्रतिगमन भाग २ भन्दै चर्को आक्रोश व्यक्त गरेका छन् । विपक्षी पाँच दलको तर्फबाट शेरबहादुर देउवालाई प्रधानमन्त्री बनाउन हस्ताक्षर गर्ने सबै सांसदले सर्वोच्चमा मुद्धाहाल्ने तयारी गरेका छन् । केही बेरमा पाँच दलको बानेश्वरमा बैठक बसेर त्यरबारेमा निर्णय लिइने नेपाली कांग्रेसका नेता रामचन्द्र पौडेलले बताए ।

प्रमुख विपक्षी नेपाली कांग्रेससहित, माओवादी केन्द्र, जसपा, एमालेको विद्रोही समूह (माधव नेपाल समूह) र राष्ट्रिय जनमोर्चाको बैठक बसेर संघर्षका कार्यक्रम तय गर्ने भएको छ ।

नेपाली कांग्रेसको पदाधिकारी र पूर्वपदाधिकारीको बैठकपछि नेता पौडेलले भने, ‘बानेश्वरमा सर्वदलीय बैठक गर्ने र हिजो देउवालाई प्रधानमन्त्री बनाउन हस्ताक्षर गरेका १४९ जनाकै तर्फबाट अदालतमा रिट हाल्नेबारे छलफल गर्छौं।’ पौडेलले दलहरूले बहुमतसहित प्रधानमन्त्रीको विकल्प दिँदादिँदै पनि प्रतिनिधि सभा विघटन गरेर संविधान र लोकतन्त्रमाथि राष्ट्रपति र प्रधानमन्त्रीले जालसाजी गरेको आरोप लगाए ।

गत राती संसद विघटन भएर मध्यावधि घोषणा भएपछि र आफूहरुको पक्षमा प्रष्ट बहुमत भएको अवस्थामा जालझेल गरेर प्रधानमन्त्री नवनाइएको भन्दै विपक्षी दलहरु आक्रोशित भएका छन् । विपक्षी गठवन्धनको पक्षमा १४९ जना सांसदहरुले हस्तक्षर नै गरेका थिए ।