काठमाडौं । प्रतिनिधि सभा विघटनविरुद्ध सर्वोच्च अदालतमा रिट दायरका लागि विपक्षी गठबन्धनमा रहेका सांसदहरुले धमाधम हस्ताक्षर संकलन गरिरहेका छन् ।

सिंहदरबारमा नेकपा माओवादी केन्द्र र नेपाली कांग्रेसको संसदीय दलमा आ आफ्ना पार्टीका सांसद नागरिकतासहित उपस्थित भएर हस्ताक्षर गरिरहेका छन् ।

विपक्षी गठबन्धनमा रहेका १४९ जना सांसदहरुका तर्फबाट रिट दायर गर्ने तयारी छ । त्यसका लागि गठबन्धनका नेताहरु अहिले कानुनविद्हरुसँग पनि छलफलमा छन् ।उनीहरुले आजै सर्वोच्चमा रिट दायर गर्ने तयारी छ ।

दर्जन बढी रिट निवेदक पुगिसके, २ बजेपछि दर्ता हुने

सर्वोच्चमा १२ बजेसम्म १३ वटा रिट पेश भएको छ। अदालत प्रशासनका अनुसार पेस भएका १३ वटा रिट निवेदनका फाइललाई क्वारेन्टाइन गरिएको छ। दिउँसो २ बजेपछि अध्ययन गरेर दर्ता प्रक्रियामा जानेछ।

रिटमा संविधान मिचेर गरिएको प्रतिनिधिसभा विघटन बदर गर्नुपर्ने, अहिलेको प्रधानमन्त्री र मन्त्रिपरिषद्ले कुनै पनि कामकारवाही नगर्न/नगराउन अन्तरिम आदेश दिनुपर्ने र शेरबहादुर देउवालाई अवसर दिनुपर्ने माग गरेका छन्।